रायगड - रस्त्यांवर पडलेले खड्डे न भरल्याने शहरातील नागरिकांना त्रास सहन करावा लागत आहे. याविरोधात काल (19 सप्टेंबर) ला राजे प्रतिष्ठानच्या वतीने अनोखं आंदोलन केलं. यावेळी वाहनचालकांना झंडू बाम देऊन रोष व्यक्त करण्यात आला.
मुंबई-गोवा महामार्गावरील खड्ड्यांच्या नावानं बोंब मारून पनवेलकर आता थकले आहेत. कारण या ठिकाणी खड्ड्यांची परिस्थिती दिवसेंदिवस अतिशय भयानक होत आहे. दरवर्षी प्रमाणे या दरवर्षी महामार्गावरील पडलेले खड्डे भरण्याचे काम केले नाही. त्यामुळे याच खड्डयातून आपली वाट शोधत प्रवास करणाऱ्या वाहनचालकांना सुखकर प्रवास करता यावा, यासाठी राजे प्रतिष्ठानच्या वतीने झंडू बाम देऊन हे अनोखं आंदोलन केलं. मुंबई – गोवा महामार्गाचा पळस्पे ते इंदापूर हा पहिला टप्पा २०११ ला सुरू झाला. त्यामुळे कोकणात जाणाऱ्या चाकरमानी व प्रवाशांना मोठा आनंद झाला होता. मात्र, महामार्गाच्या या कामाची दशकपूर्ती होत आली, तरी प्रवाशांना सुखकर प्रवास करण्याचा आनंद अजूनही मिळाला नाही आहे.
हेही वाचा - मुंबईमध्ये काँग्रेसचे आर्थिक मंदीसह महागाई विरोधात धरणे आंदोलन
अशातच आठवडाभरापासून कोसळणारा मुसळधार पाऊस, विविध प्रकल्पांतर्गत सुरू असलेली रस्ते-पुलांची कामे, अवजड वाहनांची वाढती रहदारी यामुळे पळस्पे फाटा या मार्गावर मोठे मोठे खड्डे पडले आहेत. या खड्ड्यांमुळे वाहनचालकांना पाठदुखी, कंबरदुखी, मानदुखी यासारखे आजारही जडले आहेत. तर खड्डे चुकवण्याच्या नादात अपघात होत आहे. या दररोजच्या खड्ड्यातील जीवघेण्या प्रवासामुळे पनवेलकर मेटाकुटीस आले आहेत. मात्र सत्ताधाऱ्यांकडून कुठलीही दखल घेतली जात नसल्याने राजे प्रतिष्ठानने हे आंदोलन केलं आहे. यावेळी वाहनचालकांचा रोष दिसुन आला.सत्ताधारी चांगले रस्ते तर नाही देऊ शकले पण राजे प्रतिष्ठानने आम्हाला झंडू बाम देऊन आमच्या वेदनेवर औषध तरी दिले, अशी उपहासात्मक प्रतिक्रिया काही वाहनचालकांनी दिल्या.
