पुणे - लग्नानंतर शारीरिक संबंधांना नकार देणाऱ्या पती विरोधात पत्नीने तक्रार दाखल केली आहे. तसेच शिवीगाळ, मारहाण, मानसिक आणि शारीरिक छळ केल्याचेही संबंधित तक्रारीत नमूद करण्यात आले आहे.
या घटनेबाबत 33 वर्षीय पती विरोधात चिखली पोलीस ठाण्यात गुन्हा दाखल झाला आहे. अद्याप पतीला अटक करण्यात आलेली नसून संबंधित प्रकार फेब्रुवारी ते सप्टेंबर दरम्यान घडल्याची माहिती पोलिसांनी दिली आहे.
पोलिसांनी दिलेल्या माहितीनुसार, 27 वर्षीय फिर्यादीचा फेब्रुवारी महिन्यात विवाह झाला. फिर्यादीच्या वडिलांनी लग्नावर तब्बल 20 लाखांचा खर्च केला. परंतु, विवाह झाल्यानंतर लग्नाआधी देण्यात आलेली आश्वासने पाळली नसल्याने महिलेची नाराजी झाली. लग्नानंतर पतीने कोणतीही जबाबदारी पार न पाडल्याचे फिर्यादीने सांगितले आहे.
संबंधित महिला सासरी आल्यानंतर त्यांच्यासोबत पतीने कधीही शारीरिक संबंध ठेवले नाहीत. फ्लॅट घेण्यासाठी आई-वडिलांकडून दहा लाख रुपये घेऊन येण्याची सक्ती करण्यात आली. यासाठी फिर्यादी महिलेला शिवीगाळ, मारहाण, शारीरिक आणि मानसिक छळ केल्याचे तक्रारीत नमूद आहे. आर्थिक त्रास दिल्याचेही फिर्यादीत अंतर्भूत आहे.
पती नांदवण्यास तयार नसल्याने संबंधित महिलेने चिखली पोलीस ठाण्यात तक्रार दिली आहे. त्यानुसार पोलिसांनी गुन्हा दाखल केला असून, अधिक तपास सुरू आहे.
