पुण्यात घराची भिंत कोसळल्याने महिलेचा मृत्यू; यात सुदैवाने बचावले दोन मुले

जुन्नर तालुक्यातील ओतूर मधील सावित्रीबाई फुले कन्या विद्यालयाच्या बाजुस राहात्या घराची भिंत आज पहाटेच्या सुमारास कोसळली. यात एका २८ वर्षीय महिलेचा मृत्यू झाल्याची धक्कादायक घटना घडली आहे. यात घरातच असणारी दोन चिमुकली मुले सुदैवाने बचावली आहेत. नजमा सलीम शेख असे मृत महिलेचे नाव आहे.

पुणे- येथील जुन्नर तालुक्यातील ओतूर मधील सावित्रीबाई फुले कन्या विद्यालयाच्या बाजुस राहात्या घराची भिंत आज पहाटेच्या सुमारास कोसळली. यात एका २८ वर्षीय महिलेचा मृत्यू झाल्याची धक्कादायक घटना घडली आहे. यात घरातच असणारी दोन चिमुकली मुले सुदैवाने बचावली आहेत. नजमा सलीम शेख (वय 28) असे मृत महिलेचे नाव आहे.

उत्तर पुणे जिल्ह्यात गेल्या तीन दिवसांपासुन मुसळधार पाऊस सुरु आहे. अशाच अनेक ठिकाणी दुदैवी घटना घडत आहेत. ओतुर येथील सावित्रीबाई विद्यालयाच्या बाजुला असणाऱ्या एका वाड्याची भिंत नजमा शेख यांच्या घराच्या छतावर पडली. यात संपुर्ण घरावरील छत पत्र्यासह शेख कुटुंबाचा अंगावर पडले. यामध्ये नजमा शेख या महिलेचा जागीच मृत्यू झाला. तर या घटनेत दोन लहान मुले बचावली आहेत. नजमा शेख या काहीच दिवसांपुर्वी या घरात दोन मुलांसोबत रहायला आल्या होत्या. यातील चिमुकल्या मुलांच्या आईच्या मायेचे व घराचे छत हरवल्यामुळे परिसरात हळहळ व्यक्त केली जात आहे.