घटस्थापनेच्या दिवशी मुस्लिम कुटुंबियांकडून स्त्री जन्माचे अनोखे स्वागत

शिक्रापूर येथील शेख परिवारात तीन पिढ्यांत पहिल्यांदाच मुलीचा जन्म झाला आहे. आज घटस्थापनेच्या दिवशी स्त्री जन्माचा आदर करत नवजात मुलीचे स्वागत अनोख्या पद्धतीने करण्यात आले आहे.

शिरुर (पुणे) - समाजात मुलगी नकोशी असल्याच्या घटना वारंवार घडत असताना शिक्रापुर येथील मुस्लिम कुटुंबाने मुलीच्या जन्माचे स्वागत करत पेढे वाटून फुलांच्या पायघड्या घालत आज (दि. 17 ऑक्टोबर) घटस्थापनेच्या दिवशी घरात स्वागत केले आहे. या मुलीच्या जन्माचा आनंदोत्सव पंचक्रोशीत चर्चेचा विषय बनला आहे.

शिरुर तालुक्यातील शिक्रापूर येथील शेरखान शेख व नसीम शेख या दाम्पत्याच्या परिवारात तीन पिढ्यांत पहिल्यांदाच मुलीचा जन्म झाला आहे. मुलीच्या जन्माने शेख कुटुंबात आनंदोत्सव सुरू होता. आज हिंदू धर्माचा पवित्र मानला जाणारा नवरात्रौत्सव सुरू होत आहे. याच निमित्याने स्त्री जन्माचा आदर करत नवजात मुलीचे स्वागत अनोख्या पद्धतीने करण्यात आले आहे.जात धर्माच्यापलीकडे जात स्त्री जन्माचे स्वागत करत नवरात्रीच्या पहिल्याच दिवशी शिक्रापूर येथील शेख कुटुंबियांनी रुग्णालयांतून निघताना गाडीला फुलांंनी सजवले. घरी पोहोचताच फुलांच्या पायघड्या वाजतगाजत, फटाक्यांच्या कडकडाटात चिमुकलीचे स्वागत करण्यात आले.

समाजात आजही मुलीच्या जन्माला नकोशी म्हणूनच वागवले जात असताना शिक्रापूर येथील शेख कुटुंबियांनी मुलीच्या जन्माचे केलेले अनोखे स्वागत समाजातील प्रत्येकासाठी चांगला संदेश घेऊन आला आहे. त्यामुळे प्रत्येकाने स्त्री जन्माचे स्वागत करुन या मुलीचा संभाळ फुलासारखाच करावा, असेही आवाहन शेख कुटुंबाकडुन करण्यात आला.

हेही वाचा - पुणे : पाण्याच्या लोंढ्यात वाहून गेली कार, तिघांचा बुडून मृत्यू