पुणे - दारू पिल्यानंतर घरात न घेतल्याने जावयाने सासूच्या डोक्यात लोखंडी रॉडने वार करत खून केला. पाषाण येथील संजय गांधी वसाहतीत बुधवारी दुपारी अडीच वाजण्याच्या सुमारास ही घटना घडली.
सुदामती देवराम गायकवाड (६०) असे खून झालेल्या महिलेचे नाव आहे. तर दिगंबर ओव्हाळ (वय ४५) असे आरोपीचे नाव आहे. पोलिसांनी आरोपी जावयाला ताब्यात घेतले असून त्याच्यावर गुन्हा दाखल करण्याची प्रक्रिया सुरू आहे.
औंध येथील संजय गांधी वसाहतीतील लमाण तांडा परिसरातील वाघमारे वस्ती येथे सुदामती गायकवाड आणि आरोपी दिगंबर ओव्हाळ राहत होता. दिगंबर हा मजुरीचे काम करतो. त्याचे यापूर्वीही एक लग्न झाले असून त्याने सुदामती यांच्या मुलीसोबत दुसरे लग्न केले होते. सुदामती या वारकरी होत्या. तर दिगंबर याला दारूचे व्यसन होते. त्यामुळे तो जेव्हा दारू पिऊन यायचा तेव्हा त्या त्याला घरात येऊ देत नव्हत्या. या कारणावरून त्यांच्यात अनेकदा भांडणही झाले होते. आज दुपारीही त्यांच्यात जुन्या कारणावरून वाद झाला. त्यानंतर त्याने लोखंडी रॉडने सासूला बेदम मारहाण केली. त्यात त्यांचा मृत्यू झाला.
या घटनेची माहिती मिळताच चतुःश्रृंगी पोलिसांनी तात्काळ घटनास्थळी धाव घेतली. आरोपी दिगंबर याला ताब्यात घेतले आहे. तसेच सुदामती यांचा मृतदेह ताब्यात घेऊन शवविच्छेदनासाठी ससून रुग्णालयात पाठवला आहे, अशी माहिती वरिष्ठ पोलीस निरीक्षक भास्कर जाधव यांनी दिली.
