मुंबई - राष्ट्रवादी काँग्रेसचे अध्यक्ष शरद पवार यांच्या 80 व्या वाढदिवसानिमित्त आज यशवंतराव चव्हाण सभागृहाबाहेर कार्यकर्त्यांनी गर्दी केली होती. राज्यभरातून आलेल्या या समर्थकांनी शरद पवार यांना भारतरत्न पुरस्कार द्यावा, अशी मागणी केली आहे. यासाठी त्यांनी जोरदार घोषणाबाजी देखील केली.
शरद पवार यांचे केवळ राज्यातच नाही, तर देशातील शेतकऱ्यांच्या हितासाठी मोठे योगदान असल्याचे कार्यकर्त्यांनी सांगितले. याची पोचपावती म्हणून त्यांना भारतरत्न पुरस्काराने सन्मानित करण्यात यावे, अशी मागणी यावेळी राष्ट्रवादी काँग्रेसच्या कार्यकर्त्यांनी केली.
हेही वाचा B'Day Special : बारामतीकारांनी अनुभवलेले शरद पवार...
माजी राज्यमंत्री सय्यद अली यांच्यासह ठाणे जिल्ह्यातील राष्ट्रवादी काँग्रेसचे पदाधिकारी कैलास हावळे यांच्यासह अनेक पदाधिकाऱ्यांनी आपल्या हातात बॅनर धरून घोषणाबाजी केली. त्यांचे महिलांच्या सक्षमीकरणासाठी योगदान असून त्यांना देशातील सर्वोच्च नागरी पुरस्कार मिळाला पाहिजे, अशी मागणी माजी नगरसेविका धनाबाई जाधव यांनी केली.
