बारामती (पुणे) - इंदापूर तालुक्यातील प्रतिबंधीत उजनी पाणलोट क्षेत्रात लहान माशांची अवैधरित्या चोरटी मासेमारी करणाऱ्या सात जणांना इंदापूर पोलीसांनी अटक केली आहे. या आरोपींकडून 1 लाख 2 हजार 200 रुपये किंमतीचे 1 हजार 80 किलोग्रॅम वजनाचे वेगवेगळ्या जातींचे लहान सुकवलेली मासे जप्त केली आहेत. या आरोपींना इंदापूर न्यायालयात हजर केले असता न्यायालयाने त्यांना 25 नोव्हेंबरपर्यंत पोलीस कोठडी सुनावली आहे.
याबाबत पोलिसांनी दिलेली माहिती अशी की, सोमवारी (दि. 23 नोव्हेंबर) अकलूज बायपास येथे एका वाहनामध्ये उजणी पाणलोट क्षेत्रात लहान माशांची मासेमारी करून ते वाळवून मासळी बाजारात चढ्या भावाने विक्रीसाठी घेवून चालले असल्याची माहिती इंदापूर पोलीसांना मिळाली. त्यानुसार पोलिसांनी अकलूज बायपास सरस्वतीनगर येथे मालवाहू जिपमध्ये ( एम.एच. 42 ए क्यु 3035) एकूण 48 सुती गोण्यांत वेगवेगळ्या जातींचे लहान आकाराची सुकवलेली माशांची पिल्ले भरलेली पोती आढळून आली. या जिपमधील नारायण आसाराम बनारे यांना या माशांबाबत विचारणा केली असता त्यांनी उडवाउडविची उत्तरे दिली. त्यांच्याकडे मासे पकडण्याचा कोणताही परवाना नसल्याचे तपासात निष्पन्न झाले. याबाबत संजय नारायण मेटे (वय 52 वर्षे), उपविभागिय अभियांता पळसदेव (रा.बारामती) यांनी इंदापूर पोलीस ठाण्यात तक्रार दिली.
अटक आरोपी
दाखल तक्रारीनुसार नारायण आसराम बनारे (वय 43 वर्षे, रा.सरस्वतीनगर, इंदापूर), रोहीदास दौलु बनारे (वय 21 वर्षे, रा,सदर), आकाश नारायण बनारे (वय 21 वर्षे, रा. सरस्वतीनगर, ता. इंदापूर), लक्ष्मण नारायण बनारे (वय 23 वर्षे, रा. सदर), विलास नारायण बनारे (वय 19 वर्षे, रा.सदर), विठ्ठल कांतीलाल गव्हाणे (वय 26 वर्षे, रा. पळसदेव, ता.इंदापूर), बाळासाहेब वसंत चितारे, (वय 38 वर्षे, रा. पिंपरी), एकनाथ बाळूराव विचारे (वय 32 वर्षे, रा. कालठन नंबर 2 ता. इंदापूर)
परवाना नसतानाही केली मासेमारी
अटक करण्यात आलेल्या आरोपींकडे मासे पकडण्याचा पाटबंधारे विभागाकडील कोणताही परवाना नाही. मात्र, स्वतःच्या आर्थिक फायद्यासाठी उजनी जलाशयाचे कालठन नंबर 2, शिरसोडी, सुगाव, शहा, कांदलगाव, हिंगणगावच्या हद्दीतील पात्रातून मासे पकडले आहेत. ते वाळवून मासळी बाजारात चढ्या भावाने विकी करण्यासाठी घेऊन जाण्याच्या तयारीत असताना मिळून आल्याने त्यांच्या विरोधात इंदापूर पोलीस ठाण्यात विविध कलमान्वये गुन्हा दाखल करण्यात आला आहे.
हेही वाचा - देशाला स्वर्णयुगाच्या दिशेने नेण्यासाठी उद्योजक निर्माण होणे गरजेचे- कृष्णप्रकाश
