पुणे - प्रख्यात उद्योगपती रतन टाटा त्यांचा साधेपणा रविवारी (दि. 3 जाने.) पुणेकरांना पाहायला मिळाला. कोथरूड परिसरातील एका सोसायटीत राहणाऱ्या जुन्या मित्राला भेटण्यासाठी ते स्वतः पुणे शहरात आले होते. त्यांच्या या अकस्मात पुणे भेटीने सोसायटीतील नागरिकांच्या मनात कायमचे घर केले.
वुडलँड सोसायटीतील मित्राची घेतली भेट
कोथरूड परिसरातील गांधी भवन शेजारी असणाऱ्या वुडलँड सोसायटीमध्ये रविवारी (दि. 3 जाने.) दुपारी तीन वाजण्याच्या सुमारास ते आले होते. त्यांच्या या भेटीदरम्यान कुठेही सुरक्षारक्षक नव्हते किंवा श्रीमंतीचा बडेजावपणा नव्हता. सोसायटीत राहणाऱ्या या एका जुन्या सहकाऱ्याच्या घरी जाऊन त्यांनी तब्बल पाऊण तास वेळ घालवला. रतन टाटांचे हे सहकारी मागील काही दिवसांपासून आजारी होते. त्यांची विचारपूस करण्यासाठी त्यांची भेट घेतली. पाऊण तासाच्या या भेटीत त्यांनी आपल्या सहकाऱ्याची विचारपूस केली.
साधेपणामुळे टाटा नेहमीच चर्चेत
अब्जावधी रुपयांची रोज उलाढाल करणाऱ्या रतन टाटा यांच्या साधेपणाची नेहमीच चर्चा होत असते. आजपर्यंत त्यांच्या साधेपणाचे अनेक उदाहरणे समोर आली आहे. स्वतःची बॅग स्वतः उचलणे असो किंवा विमानतळावर रांगेत उभे राहणे असो त्यांच्या या अशा कृतीतून त्यांच्यातील साधेपणा दिसून येतो. समाजकार्यातही रतन टाटा यांचे योगदान मोठे आहे. कोरोनाच्या काळात त्यांनी सामाजिक बांधिलकी जपत आर्थिक मदत दिली. कोविड रुग्णालय उभारण्याचे कामही त्यांनी केले.
हेही वाचा - पुणे मेट्रोमध्ये 'बायोडायजेस्टर'चा वापर; डीआरडीईबरोबर करार
हेही वाचा - 'या' तारखेला सुरू होणार पुण्यातील महाविद्यालये; विद्यापीठाचा महत्त्वाचा निर्णय
