खेड (पुणे)- उत्तर पुणे जिल्ह्यात शनिवारी सायंकाळी अवकाळी पाऊस झाल्याने शेतकऱ्यांची झोप उडाली आहे. द्राक्ष, टोमॅटो, गहू, हरभरा, कांद्यासह भाजीपाल्याचे मोठे नुकसान झाले. त्यामुळे शेतकरी हवालदिल झाला आहे. दुपार पासून शहरी भागात जोरदार पावसाला सुरवात झाली.
अवकाळी पाऊसाने खेड, आंबेगाव, जुन्नर व शिरूर भागास झोडपले
अवकाळी पाऊसाने खेड, आंबेगाव, जुन्नर व शिरूर या भागास झोडपून काढले. पूर्वेकडून मार्गक्रमण करत एका तासात पावसाने आंबेगाव, खेड, शिरूर व जुन्नर तालुका व्यापला. सणसवाडीत, शिक्रापूर, पाबळ, रांजणगाव, शेलपिंपळगाव, आळंदी, चाकण, खेड, नारायणगाव, मंचर, घोडेगाव, जुन्नर, शिरोली, ओझर, लेण्याद्री, पांगरी, कळंब, आळेफाटा आदी सर्वच भागात उशिरापर्यंत जोरदार पाऊस सुरू होता.
बाजरी काढणीच्या कामांना वेग
पुणे जिल्ह्यात मोठ्या प्रमाणात बाजरी काढणीच्या कामांना वेग आला असताना, काढणी केलेल्या पिकांमध्ये पाणी साचून नुकसान होण्याची भीती शेतकऱ्यांकडून व्यक्त केली जात आहे. शिरूर, खेड तालुक्यांत एक तासाहून अधिक काळ जोरदार पाऊस पडल्याने सर्व शेतकऱ्यांची झोप उडविली आहे. पाऊस संपूर्ण उत्तर जिल्ह्यात पडत असल्याने, रब्बीच्या हंगामावर पाणी फिरल्याने पिकांच्या मोठ्या नुकसानीची शक्यता आहे. सणसवाडीत परिसरात दीड तासपेक्षा जास्त वेळ पावसाच्या सरी कोसळल्या. परिसरातील शेतकरी या पावसामुळे संकटात सापडला आहे.
