पुणे - कोरोनाच्या महासंकटात अनेक उद्योगधंद्यांना मोठ्या प्रमाणात फटका बसला आहे. लॉकडाऊनमुळे अनेक यात्रा, सण व उत्सव रद्द करण्यात आले आहेत. पुण्याची शान असलेला गणेशोत्सवही यंदा साध्या पद्धतीने साजरा करण्याचा निर्णय सार्वजनिक गणेशोत्सव मंडळांनी घेतला आहे. जसा पुण्याचा गणेशोत्सव जगप्रसिद्ध आहे, तसेच ढोल-ताशा वादनही पुण्याची ओळख आहे. मात्र, यंदा सार्वजनिक गणेशमंडळांनी गणेशोत्सव साध्या पद्धतीने साजरा करण्याचा निर्णय घेतल्याने गणेशोत्सवात ढोल-ताशांचे वादन होणार की नाही? असा प्रश्न उपस्थित झाला आहे.
साधारणत: गणेशोत्सवाच्या दोन ते तीन महिने अगोदर पुण्यातील विविध ठिकाणी ढोल-ताशा पथके आपापला सराव करत असतात. यंदा पुण्यात कोरोनाचा वाढता प्रादुर्भाव लक्षात घेता ढोल-ताशा पथकांची तयारी बंद आहे. मनुष्याचे आरोग्य हा सर्वात महत्त्वाचा विषय आहे. पुण्यात दररोज मोठ्या प्रमाणात कोरोनाचे रूग्ण सापडत आहेत. अशा परिस्थितीत ढोल- ताशा पथकांच्या सरावाला सुरुवात होण्याची शक्यता नाही. ढोल-ताशा पथकांची भूमिका ही नेहेमी गणेश मंडळांना पूरक असते. प्रशासन, पोलीस आणि पुणे महानगरपालिका जो निर्णय घेतील, तो निर्णय पथकांना मान्य करावा लागेल, असे ढोल-ताशा महासंघाचे अध्यक्ष पराग ठाकूर यांनी सांगितले.
पुणे शहरात 170 पेक्षा अधिक ढोल-ताशा पथके असून त्यात 25 हजारपेक्षा जास्त वादक सहभागी आहेत. दरवर्षी विविध पथकात नवनवीन लोक सभासद म्हणून येतात. मात्र, यंदा या सर्व वादकांनी थांबावे, विचार करावा आणि नाविन्याचा शोध घ्यावा, असे ही ठाकूर यांनी सांगितले.
बँड वादकांचे पोट जसे फक्त वादनावर अवलंबून असते, तसे ढोल-ताशा पथकांचे नसते. पथकांना जे मानधन दिले जाते त्यातून पथकाचा खर्च वजा करता उरलेली रक्कम वर्षभर विविध सामजिक कामांसाठी वापरली जाते. गेल्या सहा वर्षात 6 ते 7 कोटीपर्यंत या पथकांना मानधन मिळाले आहे. गेल्या वर्षी मिळालेल्या मानधनातील उर्वरित रक्कम पथकांनी कोरोनाच्या महासंकटात लोकांना मदत करण्यासाठी वापरली आहे. त्यामुळे त्यांचा सध्या कोष रिकामा झाला आहे, अशी माहितीही पराग ठाकूर यांनी दिली.
