पिंपरी-चिंचवड पोलीस आयुक्तालयाला दोन वर्षे पूर्ण; गुन्हेगारी आटोक्यात आणण्यात पोलिसांना यश

पिंपरी-चिंचवड पोलीस आयुक्तालयाचा आज दुसरा वर्धापन दिन आहे. पोलीस आयुक्तालय स्थापन झाल्यापासून शहरातील गुन्हेगारांवर वचक ठेवण्यात स्थानिक पोलिसांना यश आले आहे. अपुरे मनुष्यबळ असतानाही चांगल्या पद्धतीचे काम पोलिसांकडून होताना दिसत आहे.

पुणे - 15 ऑगस्ट 2018 ला पिंपरी-चिंचवडसाठी स्वतंत्र पोलीस आयुक्तालयाची स्थापना झाली. आज त्याचा दुसरा वर्धापन दिन असून गेल्या दोन वर्षात शहरात गुन्हेगारीचा चढता आलेख कमी झाल्याचे पाहायला मिळत आहे. पिंपरी-चिंचवड शहर हे औद्योगिक नगरी म्हणून ओळखले जाते. पोलीस आयुक्तालय स्थापन झाल्यापासून शहरातील गुन्हेगारांवर वचक ठेवण्यात स्थानिक पोलिसांना यश आले आहे. अपुरे मनुष्यबळ असतानाही चांगल्या पद्धतीचे काम पोलिसांकडून होताना दिसत आहे.

आयुक्तालय स्थापन झाल्यानंतर आर.के पद्मनाभन यांनी पहिले पोलीस आयुक्त म्हणून आयुक्तालयाचा पदभार घेतला. त्यांनी नागरिकांच्या सुरक्षेसाठी अनेक निर्णय घेतले. हिंजवडी येथील वाहतूक कोंडी सोडवण्याचा प्रयत्न केला. त्यावेळी त्यांना संगणक अभियंत्यांकडून पाठिंबा आणि कौतुक मिळाले. मात्र, त्यांच्या कार्यकाळात काही महिने गुन्हेगारी वाढली होती हे नाकारता येणार नाही. काही महिन्यातच त्यांची बदली झाली. गेल्यावर्षी सप्टेंबर महिन्यात पोलीस आयुक्त संदीप बिष्णोई यांनी आयुक्तालयाचा चार्ज घेतला. त्यांच्या कार्यकाळात एटीएम फोडण्याचा घटनांनी डोके वर काढले होते. मात्र, वेळीच अनेक गुन्हे उघड करत गुन्हेगारांना जेरबंद करण्यात पोलीस यंत्रणा यशस्वी ठरली.