पिंपरी-चिंचवड (पुणे) - शहरात वीज बिल भरा आणि खासगीकरणापासून वाचवा, असे आवाहन सध्या महावितरणच्या कर्मचाऱ्यांकडून ऑर्केस्ट्राच्या माध्यमातून केले जात आहे. हिंदी चित्रपटातील गाणी म्हणत हे आवाहन केले जात असून बघ्यांची मोठी गर्दी पाहायला मिळत आहे. खासगीकरण झाल्यास 1 रुपयेऐवजी तुम्हाला 5 रुपये द्यावे लागतील, असेही यातून सांगण्यात आले आहे. वीज बिल भरण्याची विनवणी केली जात असून काही शंका असल्यास नागरिकांनी महावितरणच्या कार्यालयात भेट द्या, असे आवाहनही करण्यात येत आहे.
कोरोना काळात आले होते जास्त वीजबिल
सध्या महावितरण हा विषय सर्वात जास्त प्रकाश झोतात आहे. कोरोना महामारीमुळे अनेकांच्या घरात नियमित वीज सुरू होती. त्यामूळे अनेकांना भरमसाठ बिल आली असून काहींना अवाजवी बिल आल्याने ते भरण्यास ग्राहक टाळाटाळ करत आहेत. त्यामुळे महावितरणने वीजबिल न भरण्यास थेट वीज तोडण्यास सुरुवात केली होती. याचे पडसाद विधानसभेमध्ये उमटल्याचे आणि राजकारण रंगल्याच सर्वांनीच पाहिले.
थकीत वीजबिल भरल्यास होऊ शकत खासगीकरण
याच अनुषंगाने ग्राहकांनी थकीत वीजबिल भरले नाही तर महावितरणचे खासगीकरण होईल आणि ते सर्वसामान्य नागरिकांना परवडणारे नाही, असे सांगण्यासाठी महावितरणच्या कर्मचाऱ्यांना रस्त्यावर उतरून थकीत वीज बिल भरा, असे ऑर्केस्ट्राच्या माध्यमातून सांगावे लागत आहे. हे पाहण्यासाठी नागरिक गर्दी करत आहेत. मात्र, याच गर्दीतून किती वीजबिल थकबाकीदार बिल भरणार हा देखील तितकाच महत्वाचा प्रश्न आहे. त्यामुळे वेळेवर वीजबिल भरा आणि महावितरण ला खासगीकरण करण्यापासून वाचवा. हे नागरिकांच्या आणि महावितरण च्या तितकेच फायद्याचे आहे, असे म्हणावे लागेल.
हेही वाचा - मोबाईल चोरल्याच्या रागातून हॉटेल मालक व वेटरने केलेल्या मारहाणीत ग्राहकाचा मृत्यू
हेही वाचा - पश्चिम बंगालमध्ये भाजपाने सत्तेचा गैरवापर केला - शरद पवार
