देहूरोडमधील कोविड सेंटरची दुर्दशा... रुग्ण दोन-तीन दिवस विनाअंघोळीचे

पिंपरी-चिंचवड शहरालगत असलेल्या देहूरोड परिसरात 140 कोरोनाबाधित रुग्ण आहेत. त्यापैकी बरेच रुग्ण येथील कोविड सेंटरमध्ये उपचार घेत आहेत. मात्र, याठिकाणी रुग्णांना आवश्यक असलेल्या सुविधा मिळत नसून सेंटरची दुर्दशा झाल्याचे पाहायला मिळत आहे. रुग्णांनी देखील विविध सुविधा मिळत नसल्याचा आरोप केला आहे.

पिंपरी-चिंचवड- देहूरोड येथील कोविड सेंटरची दुर्दशा झाल्याचे पाहायला मिळाले असून रुग्णांना हव्या असलेल्या आवश्यक सुविधा मिळत नसल्याचा आरोप कोरोनाबाधित रुग्णांनी केला आहे. दरम्यान, मुंबई (पनवेल) मध्ये नुकतेच कोविड सेंटरमध्ये एका महिलेवर बलात्कार झाल्याची गंभीर घटना घडली होती. मात्र, देहूरोड येथील कोविड सेंटरमध्ये महिला आणि पुरुष एकत्रितच उपचार घेत असल्याचे समोर आले आहे. या प्रकरणी सेंटरच्या अधीक्षक सुनीता जोशी यांनी रुग्णांनीच कुटुंबासोबत राहण्याचा आग्रह केल्याचे म्हणत आरोप खोडून काढण्याचा प्रयत्न केला आहे.

पिंपरी-चिंचवड शहरालगत असलेल्या देहूरोड परिसरात 140 कोरोनाबाधित रुग्ण आहेत. त्यापैकी बरेच रुग्ण येथील कोविड सेंटरमध्ये उपचार घेत आहेत. मात्र, याठिकाणी रुग्णांना आवश्यक असलेल्या सुविधा मिळत नसून सेंटरची दुर्दशा झाल्याचे पाहायला मिळत आहे. रुग्णांनी देखील विविध सुविधा मिळत नसल्याचा आरोप केला आहे. देहूरोड परिसरात 100 खाटांचे कोविड सेंटर आहे. तेथे ऑक्सिजनची व्यवस्था नाही, दारे तुटलेली, पाण्याचे गिझर बंद (गरम पाणी नाही) कचऱ्याचे ढीग आहेत. काही रुग्णांनी दोन ते तीन दिवस झाले अंघोळ केली नाही. दारे तुटलेली असल्याने थंड वाऱ्याने कोरोना रुग्ण त्रस्त आहेत. देहूरोडला रुग्णाची संख्या वाढली आहे. सेंटरमध्ये आत्तापर्यंत 150 रुग्ण उपचारासाठी दाखल केले होते, त्यापैकी 60 रुग्ण कोरोनामुक्त झालेत तर सध्या 37 रुग्णांवर या सेंटरमध्ये उपचार सुरू आहेत. बाकीच्या रुग्णांना त्यांच्या घरी क्वारंटाईन करण्यात आले आहे. आरटीआय कार्यकर्ते श्रीजित रमेशन यांनी स्वतः पीपीई किट परिधान करुन कोविड सेंटरमध्ये जाऊन पोलखोल केली आहे. मात्र, देहूरोड सेंटरच्या अधीक्षक सुनीता जोशी यांनी काही आरोप फेटाळून लावत दार, आणि इतर सुविधा नसल्याचे त्यांनी मान्य केले आहे. दरम्यान, कोविड रुग्णांना लवकरात लवकर सुविधा देऊन त्यांच्यावर योग्य उपचार होण्याची नितांत गरज आहे. त्यानंतर देहूरोड शहर हे कोरोनामुक्त होईल हे मात्र नक्की!