पुणे - महाराष्ट्र विधानसभेच्या कसबा पेठ व चिंचवड पोटनिवडणूक केंद्रीय निवडणूक आयोगाकडून जाहीर करण्यात आली आहे. कसबाच्या भाजप आमदार मुक्ता टिळक यांचे कर्करोगाने निधन झाल्याने जागा रिक्त झाली आहे. तसेच चिंचवडमध्ये भाजपचे आमदार लक्ष्मण जगताप यांचे निधान झाल्याने जागा रिक्त झाली होती. केंद्रीय निवडणूक आयोगाने या दोन जागांसाठी पोटनिवडणूक जाहीर केली आहे. या निवडणुकीसाठी मतदान 27 फेब्रुवारी रोजी पार पडणार आहे. तर, मतमोजणी २ मार्च रोजी होणार आहे. या पोटनिवडणुकीसाठी भाजप व कॉंग्रेसचे उमेदवार रिंगणात आहेत. दरम्यान, या दोन्ही पोटनिवडणुकीसाठी मनसेने भाजपला पाठिंबा जाहीर केला आहे. मात्र, मनसे प्रचाराच्या रिंगणात उतरणार नसल्याचेही त्यांनी जाहीर केले आहे.
कसबा मतदारसंघ - विधान परिषद निवडणुकांनंतर आता पुण्यातील कसबा पोटनिवडणुकीकडे सर्वांचे लक्ष लागले आहे. गेल्या काही दिवसांपासून चर्चेत असणाऱ्या कसबा पेठ पोटनिवडणुकीसाठी निवडणूक कार्यक्रम जाहीर करण्यात आला आहे. कसबाच्या भाजप आमदार मुक्ता टिळक यांचे कर्करोगाने निधन झाल्याने पोटनिवडणूक जाहीर करण्यात आली आहे. या पोटनिवडणूकीसाठी भाजपकडून हेमंत रासने तर महाविकास आघाडीकडून काँग्रेसचे रवींद्र धंगेकर मैदानात आहेत. पुणे जिल्ह्यातील सर्वात जुन्या क्षेत्रांपैकी कसबा पेठ हा विधानसभा मतदारसंघ पुणे लोकसभा मतदारसंघातील आहे. हा मतदारसंघ कसबा म्हणूनही ओळखले जातो. या मतदारसंघाला 'हार्ट ऑफ पुणे सिटी' असेही संबोधले जाते. 1995 पासून या जागेवर भारतीय जनता पक्षाचा कब्जा आहे.
मतदारसंघावर भाजपचे वर्चस्व : पुण्याचे विद्यमान खासदार गिरीश बापट यांनी कसबा पेठ मतदारसंघाचे 25 वर्षे प्रतिनिधित्व केले. त्यांनी 1995 ते 2019 पर्यंत भाजप आमदार म्हणून कसबा मतदारसंघात बाजी मारली आहे. विधानसभा निवडणूक 2019 मध्ये भाजपच्या मुक्ता टिळक विजयी झाल्या होत्या. कसबा मतदारसंघात 1990 ते 2019 पर्यंत या मतदारसंघातून भाजपचे उमेदवार विजयी झाले आहेत.
चिंचवड मतदारसंघ - भाजप आमदार लक्ष्मण जगताप यांचे निधन झाल्यामुळे पोटनिवडणूक जाहीर झाली आहे. चिंचवड मतदारसंघाच्या पोटनिवणूकीसाठी महाविकास आघाडीचे बंडखोर उमेदवार राहुल कलाटे यांनी माघार घेतली नाही. त्यामुळे आता निवडणूकीत तिरंगी लढत होणार आहे. चिंचवड पोटनिवडणूकीसाठी भाजप उमेदवार अश्विनी जगताप, महाविकास आघाडीचे उमेदवार नाना काटे, आणि अपक्ष उमेदवार राहुल कलाटे हे उमेदवार आहेत.
चिंचवड मतदारसंघाबद्दल : पिंपरी-चिंचवड परिसराला ‘डेट्रॉईट ऑफ द ईस्ट’ असेही म्हटले जाते. चिंचवड हे मोठ्या, मध्यम आणि लहान क्षेत्रातील 4000 हून अधिक औद्योगिक युनिट्सचे ठिकाण आहे. चिंचवडमध्ये देशातील काही नामांकित MNCs आणि कंपन्यांचा समावेश आहे. पिंपरी-चिंचवड आणि पुणे हे भारतातील सर्वात मोठ्या औद्योगिक क्षेत्रांपैकी एक मानले जाते. यामुळे मुंबईनंतर महाराष्ट्रातील दुसरे सर्वात मोठे औद्योगिक शहर बनले आहे. चिंचवड मतदारसंघाची 2008 मध्ये निर्मीती करण्यात आली. 2009 ते 2019 च्या सार्वत्रिक निवडणुकीत शिवसेनेने या मतदारसंघातून 01 क्रमांकाचा पक्ष म्हणून कामगिरी बजावली आहे.
लक्ष्मण जगताप यांच्या निधनामुळे पोटनिवडणूक : भारतीय जनता पक्षाचे आमदार लक्ष्मण जगताप यांचे वयाच्या 59 व्या वर्षी दीर्घ आजारामुळे निधन झाले. पुण्यातील खासगी रुग्णालयात उपचार सुरु असताना आज त्यांनी 3 जानेवारी रोजी अखेरचा श्वास घेतला होता. दिवंगत आमदार लक्ष्मण जगताप हे अनेक दिवसांपासून कर्करोगाशी झुंज देत होते. भाजपच्या प्रामाणिक कार्यकर्ते तसेच पक्षादेशाला त्यांनी नेहमी प्रमाण मानून राजकीय जीवनात काम केले. अगदी कर्करोगाशी झुंजत असताना त्यांनी मुंबईत येऊन राज्यसभा आणि विधान परिषद निवडणुकीकरिता मतदान केले होते. त्यांची कर्तव्यनिष्ठा पाहून जगताप यांच्या निधनानंतर राज्याचे उपमुख्यमंत्री देवेंद्र फडणवीस भारावून गेले होते.
