पुण्यात 18 टन कचऱ्यातून शोधले सोन्याचे दागिने... नकळत फेकून दिली होती पर्स!

पिंपरी-चिंचवडच्या मोशीत सफाई कर्मचाऱ्यांनी 18 टन कचऱ्यातून एका महिलेचे दागिने शोधून परत दिल्याची घटना समोर आली आहे.

पुणे - पिंपरी-चिंचवडमध्ये सफाई कर्मचाऱ्यांनी 18 टन कचऱ्यातून एका महिलेचे दागिने शोधून परत दिले आहेत. ही घटना मोशी येथे घडली असून महिलेने सफाई कर्मचाऱ्यांचे आभार मानले. पिंपळे गुरव येथे राहणाऱ्या महिलेने सोने आणि चांदीचे दागिने असलेली पर्स घंटा गाडीत नकळत टाकून दिली. त्यात दागिने असल्याचं लक्षात आल्यानंतर संबंधित महिलेने मोशी कचरा डेपोशी संपर्क साधून सुनेसाठी बनवलेले पाच ग्रॅम सोने चांदीचे कचऱ्यात गेल्याचं सांगितलं. यानंतर त्यांच्यासमोर सफाई कर्मचारी हेमंत लखन यांनी 18 टन कचऱ्यामधून दागिन्यांची पर्स शोधून परत केली आहे.

पिंपळे गुरव येथे महिलेच्या घरी दिवाळीनिमित्त घराची सफाई सुरू होती. यावेळी त्यांनी वापरात नसलेली पर्स कचऱ्याची गाडी येताच त्यात फेकली. मात्र, काही मिनिटांनी त्यात सुनेचे दागिने असल्याचे लक्षात आले. यानंतर महिलेने मोशी कचरा डेपोशी संपर्क साधला. सफाई कर्मचारी हेमंत लखन यांनी त्यांना बोलावून घेतले. समक्ष 18 टन कचरा पाहून त्यात सोने चांदीचे दागिने असलेली पर्स शोधून त्यांना परत केली. यानंतर त्यांनी लखन यांचे आभार मानले.