पुणे : Lalit Patil Photos With Girlfriend : मुंबई पोलिसांनी ससून रुग्णालयातून पलायन केलेला ड्रग्स माफिया ललित पाटील याला काल (बुधवारी) अटक केली. यानंतर पुणे पोलिसांकडून देखील ललित पाटील यांच्या दोन मैत्रिणींना नाशिक येथून अटक केली आहे. या दोघींनीही त्याला पळून जाण्यासाठी मदत केली होती. ललित पाटील यांच्या नंतर त्याच्या प्रेयसीला अटक केल्यावर अनेक प्रकरणे बाहेर येत आहेत. आता ललित पाटील आणि त्याची प्रेयसी प्रज्ञा कांबळे हीचे काही फोटो समोर आले असून हे फोटो पहिलं असता ललित पाटील याचा तुरुंगवास सुरू होता की, मौज मजा असा प्रश्न उपस्थित केला जात आहे. (Lalit Patil News Update)
तुरुंगवासाच्या नावाआड आलिशान जीवन : अंमली पदार्थ तस्करी प्रकरणात अटक असलेला ललित पाटील हा आजाराच्या कारणाने गेल्या वर्षभरापासून पुण्यातील ससून रुग्णालयात उपचार घेत होता. या दरम्यान त्याचं राहणीमान हे पंचतारांकित असल्याचं समोर आलं आहे. आता त्याच्या प्रेयसी आणि मैत्रिणीला अटक केल्यावर ललित पाटील आणि त्याच्या प्रेयसीचे काही फोटो हे समोर आले आहेत. या दोघांचे फोटो पाहिले तर ललित पाटील हा उपचार घेत असताना देखील तो त्याच्या प्रेयसी बरोबर मौज मजा करत असताना दिसतोय. तसेच त्याची प्रेयसी ही नाशिक येथील त्याच्या घरी देखील गेली असून तिचा ललित पाटीलच्या आई बरोबर काढलेला फोटो समोर आला आहे.
तुरुंग व रुग्णालय प्रशासनावर प्रश्नचिन्ह : हे फोटो पाहिले असता येरवडा कारागृह प्रशासन आणि ससून रुग्णालय प्रशासन यांच्यावर अनेक प्रश्न उपस्थित केले जात आहेत. एखादा कैदी तुरुंगवासात असताना तो उपचाराच्या नावाखाली ससून रुग्णालयात दाखल होतो. मात्र, तो तेथे न राहता एका पंचतारांकित हॉटेलमध्ये प्रेयसी बरोबर मौज मजा करत असल्याने अनेक प्रश्न हे उपस्थित केले जात आहेत.
काळ्या कमाईतून मिळवलेला पैसा मैत्रिणीकडे : ललित पाटील याला ससून रुग्णालयातून पळून जाण्यासाठी त्याची प्रेयसी प्रज्ञा कांबळे आणि तिची मैत्रीण हिने मदत केली आहे. फरार असल्याच्या काळात तो सातत्याने या दोघींच्या संपर्कात होता. ड्रग्सच्या काळ्या कमाईतून मिळवलेला पैसा ललित पाटीलने या दोघींकडे ठेवल्याची माहिती आहे.
दरम्यान, हे सर्व फोटो सोशल मीडियावर व्हायरल झालेले आहेत.
हेही वाचा:
