पुणे - सोशल डिस्टन्सिंग ठेवण्याचे आवाहन देशाचे पंतप्रधान नरेंद्र मोदी यांनी केलं होतं. त्यानंतर विविध ठिकाणी त्याचे पालन केले जात असल्याचे दिसत आहे. दरम्यान, अवघा देश लॉकडाऊन असून २१ दिवस नागरिकांना घरात राहण्याचे आदेश देण्यात आले आहेत. परंतु, पिंपरी-चिंचवड शहरातील अनेक नागरिकांना घरात बसून कंटाळवाणे होत असून ते सायंकाळच्या सुमारास टेरेसचा सहारा घेतात. तिथे अनेकांच्या गप्पा रंगत आहेत. मात्र, टेरेसवरही नागरिकांमध्ये सोशल डिस्टन्सिंग पालन होताना दिसत आहे.
पिंपरी-चिंचवड शहरात अनेक नागरिकांना घरात कंटाळवाणे होते, म्हणून ते टेरेसचा सहारा घेत आहेत. दिवसभर नागरिक घरात करणार तरी काय? त्यामुळे लहान मुले, तरुण, आई, वडील, आजोबा, आजी हे सर्व एकत्र टेरेसवर जाऊन बसत असताना सोशल डिस्टन्सिंग पाळले जात आहे.
गप्पा मारत असताना दोघांमध्ये काही मीटरचे अंतर ठेवले जात आहे. त्यामुळे नागरिक हे कोरोना विषाणूसंबंधी सतर्क राहत असून काळजी घेत असल्याचे दिसत आहे. पिंपरी-चिंचवड शहरात कोरोना बाधित असलेले १२ रुग्ण आढळले होते. महाराष्ट्रत सर्वात जास्त रुग्ण हे याच शहरात होते. परंतु, आता परिस्थिती बदलली आहे. रुग्ण वाढत नसल्याने शहरात समाधानकारक वातावरण असून नागरिक बाहेर न पडता पोलिसांना सहकार्य करत आहेत.
