पुणे - कोरोनाच्या पार्श्वभूमीवर लॉकडाऊन जाहीर करण्यात आला आहे. या लॉकडाऊनमध्ये अत्यावश्यक सेवा वगळता सर्व प्रकारचे व्यवहार ठप्प असल्याने हातावरचे पोट असणाऱ्या गोरगरीब नागरिकांवर उपासमारी सारखे दुसरे नवे संकट उभे ठाकले आहे. याचा विचार करून बारामतीत राष्ट्रवादी काँग्रेस पक्षासह सामाजिक संघटना व कार्यकर्त्यांकडून गरजूंना धान्य वाटप करण्यात आले.
निराधार व हातावरचे पोट असणाऱ्या कुटुंबियांवर लॉकडाऊनमुळे जगण्याचा प्रश्न निर्माण झाला होता. अशावेळी उपमुख्यमंत्री अजित पवार यांच्या सूचनेवरून आपत्कालीन निधीतून राष्ट्रवादी तर्फे शहरातील ६ हजार ५०० कुटुंबीयांना मोफत धान्य वाटप करण्यात आले. तालुक्यातील सावळ गावामध्ये माजी सरपंच रमेश साबळे यांच्या वतीने १२५ गरजू कुटूंबियांना मोफत जीवनावश्यक वस्तुंचे वाटप करण्यात आले. बारामती येथील जनक्रांती संग्राम या सामाजिक संघटनेच्या माध्यमातून सचिन जगताप व राजेश पडकर यांनी गरजूंना अन्नधान्य देण्याचे आवाहन केले होते. या आवाहनाला प्रतिसाद देत शहरातील दानशूर व्यक्तींनी १५० कुटूंबियांसाठी धान्य स्वरूपात मदत केली.
लॉकडाउन मुळे अन्नपाण्यावाचून संकटात सापडलेल्या गरजू कुटुंबीयांना नगराध्यक्षा पौर्णिमा तावरे, उपनगराध्यक्षा तरन्नुम सय्यद, माजी उपनगराध्यक्ष बिरजू मांढरे, विद्यमान नगरसेवक, नगरसेविका यांच्यासह सामाजिक संघटनेचे सचिन जगताप, राजेश पडकर यांनी मोलाची कामगिरी बजावली.
करोना रोगाच्या पार्श्वभूमीवर संपूर्ण देशात लॉकडाऊन असल्यामुळे ग्रामीण भागात रोजंदारीवर काम करणाऱ्या कुटुंबांना रोजगार मिळत नाही. बाहेर फिरता येत नाही, काम मिळत नाही अशा परिस्थितीत लोकांवर उपासमारीची वेळ आली आहे. राज्यातील प्रत्येक गावामध्ये किमान दहा सधन व्यक्तींनी अशाप्रकारे रोजंदारीवर काम करणाऱ्या कुटुंबांना मदत केल्यास लॉकडाऊनच्या काळात खूप मोठी मदत होईल, असे सावळचे माजी सरपंच रमेश सावळे म्हणाले.
