पुणे - देशातील ९ राज्यातील १३१हून अधिक गडकिल्ल्यांवर आणि परदेशातील ६ किल्ल्यावर एकाच दिवशी दुर्गपूजा करण्यात आली. गडकिल्ल्यांचा ऐतिहासिक वारसा व दुर्गसंवर्धनाच्या संकल्पनेतुन ही पूजा करण्यात आली. विविध सरदार, संस्थानिक व राज घराण्यातील प्रतिनिधींच्या उपस्थितीत दुर्गपूजा करण्यात आली. यासाठी शिवाजी ट्रेल संस्था व किल्ले भोरगिरी संवर्धन समितीच्या संयुक्त विद्यमाने दुर्गपुजा आयोजित करण्यात आली होती
ऐतिहासिक सोहळा भिमाशंकर जवळील भोरगिरी भोरगडावर उत्साहात पार पडला. शिवाजी ट्रेल संस्थेचे दुर्गपुजेचे हे २२वे वर्ष आहे. कागल-कोल्हापूर येथील ऐतिहासिक घाटगे सरदार घराण्याचे वंशज पृथ्वीराज घाटगे व शिवाजी ट्रेलचे संचालक तथा किल्ले भोरगीरी संवर्धन समिती अध्यक्ष सचिन तोडकर यांच्या हस्ते भोरगिरी किल्ल्यावरील लेण्यांमध्ये असणाऱ्या शिवमंदिरात दुर्गपुजा पार पडली.
दुर्ग संवर्धन कार्याला बळकटी मिळावी, सर्वसामान्य नागरिक व शिवभक्त गड-किल्ल्यांकडे आकर्षित व्हावेत, प्रत्यक्ष गड-किल्ल्यांवर उपस्थित राहावेत, त्यांना गड-किल्ले पाहण्याची व दुर्गसंवर्धनाची गोडी निर्माण व्हावी, या उद्देशाने दुर्गपूजेचा उपक्रम सुरू करण्यात आला.
शिवाजी ट्रेलच्यावतीने सालाबाद प्रमाणे या वर्षीही महाराष्ट्र, पंजाब, दिल्ली, जम्मू, राजस्थान, गुजरात, मध्यप्रदेश, कर्नाटक, दमन, गोवा आदी राज्यातील १३१ हून अधिक गड-किल्ल्यांवर एकाच वेळी दुर्गपूजा करण्यात आली. तर यंदा भारताबाहेरील सिंगापूर, ओमन, कॅनडा, अमेरीका, जर्मनी, दुबई या देशांमध्येही प्रत्येकी एका किल्ल्यावर दुर्गपुजा करण्यात आली. दुर्गपुजेसाठी निवडण्यात आलेल्या देशभरातील १३१ किल्ल्यांपैकी सुमारे ५० किल्ल्यांवरील दुर्गपुजेस शिवकालीन सरदार, संस्थानिक व राज घराण्यातील वंशज उपस्थित होते
