रेमडेसिवीरचा काळाबाजार थांबवा, अन्यथा तीव्र आंदोलन छेडण्याचा भाजयुमोचा इशारा

रेमडेसिवीर औषधांच्या किमतीत समानता आणा, काळाबाजार थांबवा, या मागणीसाठी पुण्यातील अन्न व औषध प्रशासनाच्या कार्यालयाबाहेर भाजयुमोकडून निदर्शने करण्यात आली.

पुणे - शहरात दरदिवशी कोरोनाग्रस्तांची मोठ्या प्रमाणावर भर पडत आहे, अशातच रेमडेसिवीर हे उपचारात महत्त्वाचे औषध असल्याने त्याची उपलब्धता सुरळीत होणे अपेक्षित आहे. पण, पुणे शहरात या औषधांचा तुटवडा भासत असून यामुळे गरीब रुग्णांचे अतोनात हाल होत आहेत. हे औषध उपलब्ध करून देण्यात यावे व काळाबाजार थांबवावा, अन्यथा तीव्र आंदोलन करण्यात येईल, असा इशारा देत भारतीय जनता युवा मोर्चाच्यावतीने अन्न व औषध प्रशासनाच्या कार्यालयाबाहेर निदर्शने करण्यात आली आहे.

रेमडेसिवीर या औषधाचा पुरवठा चार कंपन्या करतात. त्यामध्ये कॅडेलची किंमत 2 हजार 800 रुपये, सिप्लाची किंमत चार हजार रुपये, ज्युबिलटची किंमत 4 हजार 700 रुपये, हेटरोची किंमत 5 हजार 400 रुपये आहे. या संकटात सर्वसामान्यांना परवडेल, अशा किमतीत ते उपलब्ध होणे अपेक्षित आहे. पण, असे न होता गोरगरीब रुग्णांची लूट सुरू आहे. एकीकडे शहरात तुडवडा नाही, असे म्हटले जाते. तर दुसरीकडे, रुग्णांना रेमडेसिवीर औषध उपलब्ध होताना दिसत नाही. शहरात मोठ्या प्रमाणात काळाबाजार सुरू असून तो रोखला पाहिजे. रेमडिसिवीर उपलब्ध झाले नाही तर, तीव्र आंदोलन करू, असा इशारा भाजयुमोचे शहराध्यक्ष राघवेंद्र मानकर यांनी दिला.