पुणे- कोरोना व्हायरसच्या पार्श्वभूमीवर लावण्यात आलेल्या लाॅकडाऊनच्या काळात शहरातील गंभीर गुन्हेगारी कमी झाली आहे. मात्र, सायबर गुन्ह्यात कमालीची वाढ झाल्याची दिसून आले आहे. मोबाईल वापरताना नकळत होणाऱ्या चुकांमुळे सायबर गुन्ह्याचे प्रकार घडत आहेत. यावर्षी आतापर्यंत 4 हजारांहून अधिक सायबर गुन्ह्याच्या तक्रारी दाखल झाल्या आहेत. यावर्षी दाखल झालेले हे गुन्हे मागील वर्षापेक्षा 10 ते 12 टक्यांनी जास्त आहेत. यावर्षी दाखल झालेल्या तक्रारीत सोशल मीडियावरुन फसवणूक झालेल्यांची संख्या सर्वाधिक आहे.
हेही वाचा- शाब्बास..! लॉकडाऊनमध्ये बाप-लेकाने खोदली विहीर, पाणी प्रश्न कायमचा मिटवला
लॉकडाऊनच्या काळात नागरिक घरात बसून आहेत. या काळात मनोरंजनासाठी किंवा इतर कामासाठी इंटरनेटचा वापर वाढला आहे. याचा परिणाम असा झाला की मार्च, एप्रिल आणि मे या तीन महिन्यात व्हाॅट्सअ‌ॅप, फेसबुक आणि इन्स्टाग्राम हॅक करण्याचे प्रमाण वाढले आहे. मागील वर्षी अशाप्रकारच्या घटना कमी आहेत. मात्र, लाॅकडाऊनदरम्यान मागील तीन महिन्यात अशाप्रकारच्या 22 ते 23 तक्रारी सायबर विभागाकडे आल्या आहेत, अशी माहिती वरिष्ठ पोलीस निरीक्षक जयराम पायगुडे यांनी दिली.
सोशल मिडियावरुन फसवणूकीचे प्रमाण वाढले व्हाॅट्सअ‌ॅप, फेसबुक किंवा इन्स्टाग्रामवर वैयक्तिक किंवा एखाद्या ग्रुपमध्ये एखादी लिंक येते. ही लिंक आपण उघडावी यासाठीचा आकर्षक मथळा याठिकाणी लिहिलेला असतो. संबंधित लिंक ओपन केली की हॅकर आपल्या मोबाईल मधील डेटा हॅक करू शकतो. मग यात तुमच्या बॅकेची माहिती, तुमचे फोटो, फोन नंबर अशी सर्व माहिती हॅकर्सकडे पोहोचते. या याहिचा हॅकर्स गैर फायदा घेऊ शकतो. मागील काही दिवसात असे प्रकार घडत आहेत. याबाबच्या तक्रारी सायबर विभागाकडे आल्या आहेत.अशा गुन्ह्याला तक्रारदार व्यक्तीच प्रतिबंध घालू शकतो. तुमचे अकाउंट हॅक झाल्याचे लक्षात आल्यानंतर संबंधित अकाउंट रिपोर्ट करुन फसवणूक टाळता येऊ शकते,अशी माहिती सायबर क्राईम विभागाचे वरिष्ठ पोलीस निरीक्षक, जयराम पायगुडे यांनी दिली.
ऑनलाईन फसवणूक टाळण्यासाठी हे करावे...- सोशल मीडियाचा वापर करणाऱ्यांनी कुठलीही पोस्ट फॉरवर्ड करण्यापूर्वी त्याची सत्यता पडताळून पहावी. - फॉरवर्ड केलेल्या पोस्टमुळे कुणाच्या धार्मिक भावना तर दुखावल्या जाणार नाहीत ना याची काळजी घ्यावी. - सोशल मिडियाचा वापर करताना मॅन टू मॅन वापर करावा, ग्रुप चॅटींगचा वापर करणे शक्यतो टाळा.- दोनशेच्यावर सदस्यसंख्या असलेल्या ग्रुपमध्ये आलेली लिंक ओपन करण्याचे टाळा.- अनोळखी नंबरवरुन येणारे कॉल उचलणे टाळा. - फसवणूक टाळण्यासाठी ओटीपी, बँक डिटेल्स, कार्ड डिटेल्स शेअर करू नका.
