बारामती (पुणे) - अनधिकृत बांधकाम करणाऱ्यांवर थेट फौजदारी कारवाई करण्याचे पाऊल बारामती नगरपालिकेने उचलले आहे. नोटीस दिल्यानंतरही अनधिकृत बांधकाम काढून न टाकल्याप्रकरणी सम्राट रमेश शहा (रा. महावीर पथ, बारामती) यांच्याविरोधात बारामती शहर पोलीस ठाण्यात गुन्हा दाखल करण्यात आला आहे.
शहा यांना पहिली नोटीस
नगरपालिकेचे सहायक नगररचनाकार रोहित राजेंद्र पाटील यांनी याबाबत फिर्याद दिली. त्यानुसार शहा यांच्या विरोधात पोलिसांनी महाराष्ट्र प्रादेशिक व नगररचना अधिनियम १९६६ ते कलम ५२ व ५४ नुसार गुन्हा दाखल केला आहे. फिर्यादीत नमूद केल्यानुसार सम्राट शहा यांना बारामती नगरपालिकेने सुधारित बांधकाम परवान्याच्या अन्वये ८ नोव्हेंबर २०११ रोजी परवानगी दिली होती. परंतु, हे बांधकाम करणाऱ्या शहा यांनी मंजुरी न घेताच वाढीव बांधकाम केल्याचे निदर्शनास आले होते. यामुळे पालिकेने त्यांना २८ ऑगस्ट २०२० रोजी नोटीस बजावली होती. या नोटिशीमध्ये मंजूर बांधकाम व्यतिरिक्त केलेले वाढीव बांधकाम काढून टाकावे, अशी सूचनाही करण्यात आली होती.
हेही वाचा - 'तर महाविकास आघाडीची ताकद कायम राहील, मंत्री ठाकुरांचा संजय राऊतांना टोला'
दुसऱ्या नोटिशीनंतरही योग्य कारवाई न केल्याने गुन्हा दाखल
निर्धारित मुदतीत शहा यांनी कोणताही सुधारित प्रस्ताव नगरपालिकेकडे दाखल केला नाही. तसेच, केलेले अनधिकृत बांधकाम काढून घेतले नाही. दिनांक ९ ऑक्टोबर २०१९ रोजी पालिकेचे क्षेत्रीय अधिकारी देविदास साळुंखे व रचना सहाय्यक अक्षय तोरस्कर यांनी बांधकामाच्या ठिकाणी पाहणी केली. त्या वेळी मंजुरीपेक्षा वाढीव बांधकाम केल्याचे निदर्शनास आले. त्यानंतर पुन्हा १६ ऑक्टोबर २०२० रोजी वाढीव बांधकाम काढावे, अशी नोटीस पालिकेकडून देण्यात आली. त्यानंतरही हे बांधकाम न काढल्याने शहा यांच्या विरोधात गुन्हा दाखल करण्यात आला.
हेही वाचा - वीज कापू नका अन्यथा आम्ही पुन्हा जोडणी करू - नितीन गवळी
