नाशिक : 'व्हॅलेंटाईन डे' च्या पार्श्वभूमीवर गुलाबाला देशभरातून मोठी मागणी वाढलीय. गेल्या काही दिवसांपूर्वी 7 रुपयांना विकला जाणारा गुलाब 10 रुपयांना विकला जात आहे. यात ग्राहक टॉप सीक्रेट गुलाबाला अधिक पसंती देत असल्याचं फुल उत्पादक शेतकरी पंकज पिंगळे यांनी सांगितलं.
'व्हॅलेंटाईन डे' मुळं गुलाब खात आहे भाव : द्राक्ष, कांदा पाठोपाठ नाशिकमध्ये मोठ्या प्रमाणात गुलाबाची शेती केली जाते. प्रेमाचं प्रतीक म्हणून गुलाबाला ओळखलं जातं. मग एखाद्या प्रिय व्यक्तीसाठी प्रेम व्यक्त करण्यासाठी, लग्न समारंभ, वाढदिवस किंवा धार्मिक कार्यक्रमासाठी देखील गुलाबाला मोठी मागणी असते. 14 फेब्रुवारी होणाऱ्या 'व्हॅलेंटाईन डे' मुळं गुलाब भाव खाऊन जात आहे. दोन महिन्यांपूर्वी 150 रुपये डझनने विकला जाणारा गुलाब आता चक्क 200 ते 220 रुपये डझनने विकला जात आहे. त्यामुळं बाराही महिने विविध समारंभासाठी फुलांची मागणी असल्यानं शेतकरी फुल शेतीकडं वळाला आहे.
मुंबई दिल्लीला होते गुलाबाची निर्यात : शहरातील मखमलाबाद सोबत जिल्ह्यातील दिंडोरी, खेडगाव, पालखेड, मोहाडी, जानोरी या भागात 80 हेक्टर क्षेत्रावर फुलशेती केली आहे. तसेच 15 हेक्टरवर पॉलिहाऊसमध्ये विविध प्रकारच्या गुलाबाचं उत्पादन होतं. यात टॉप सीक्रेट, बोंडेक्स, सिलीयर, सफेद गुलाब, पिंक गुलाब अविलॉन्च या गुलाबांना देशभरातून अधिक मागणी आहे. नाशिकमधून दररोज दिल्लीला एक लाख तर मुंबईला दोन लाख गुलाब निर्यात केली जाते. तसेच हाच गुलाब पश्चिम आशियासह सिंगापूर, युरोपात व्यापाऱ्यांमार्फत पाठवला जातो.
अनुकूल वातावरण : "नाशिक जिल्ह्यातील वातावरण गुलाब शेतीला अनुकूल आहे. त्यामुळं बहुतांशी शेतकरी आता फुलशेतीकडं वळाला आहे. इतर पिकांच्या तुलनेत फुलशेतीत जोखीम कमी असून बाजारपेठही उपलब्ध होते. आमचे गुलाब व्यापाऱ्यांमार्फत मुंबई, दिल्लीला जातात. तसेच स्थानिक बाजारपेठेत इव्हेंट मॅनेजमेंट आणि फुल विक्रेत्यांमार्फत आम्ही आमच्या फुलांची विक्री करतो", असं संजय पिंगळे यांनी सांगितलं.
दोन महिने गुलाबाला अधिक मागणी : "दरवर्षी जानेवारी, फेब्रुवारी महिन्यात लग्न समारंभ, धार्मिक कार्यक्रम तसेच व्हॅलेंटाईन डे असल्यामुळं गुलाबाला अधिक मागणी असते. जानेवारी आधी साधा गुलाब 15 ते 20 रुपये डझन विकला जातो. तोच आता 35 ते 40 रुपये डझन विकला जात आहे. त्यामुळं आमच्यासारख्या फुल शेती करणाऱ्या शेतकऱ्यांना याचा फायदा होतो" असं पंकज पिंगळे म्हणाले.
पॉलिहाऊसमध्ये एकरी 60 लाखाचा खर्च : पॉलिहाऊसमध्ये होणाऱ्या गुलाबांना अधिक मागणी आहे. सध्या शेतकऱ्यांनी नवीन तंत्रज्ञानाचा अवलंब करत पॉलिहाऊसमध्ये फुलांची लागवड करण्यास सुरुवात केलीय. यासाठी एकरी 55 ते 60 लाख रुपये खर्च येतो. तसेच उघड्यावरील गुलाब शेतीसाठी एकरी चार ते पाच लाख रुपये खर्च येतो. महाराष्ट्र शासन कृषी विभागाच्या वतीनं शेतकऱ्यांसाठी पॉलिहाऊस उभारण्यासाठी मोफत मार्गदर्शन दिलं जातं. शिवाय एकात्मिक विकास फलोत्पादन अभियानांतर्गत 50 टक्के अनुदान दिलं जातं असल्याची माहिती पंकज पिंगळे यांनी दिली.
गुलाबाचे दर खालील प्रमाणे (12 गुलाबाचा गुच्छ)
| प्रकार | आधी | आता |
| बोंडेक्स | 30 | 60 |
| सलियर | 130 | 170 |
| अविलॉन्च | 120 | 160 |
| सफेद गुलाब | 100 | 150 |
| पिंक गुलाब | 130 | 180 |
| टॉप सिक्रेट | 80 | 120 |
हेही वाचा -
