पुणे - दुष्काळी परिस्थितीमुळे सध्या प्रत्येकाचेच लक्ष आभाळाकडे लागले आहे. राज्यातील धरणांमधील पाणीसाठाही कमी होत चालला आहे. अशातच पुणे जिल्ह्यातील चासकमान धरणातील पाणीसाठा संपुष्टात आल्याने धरणामध्ये गेलेले वाडा गाव व गावातील शिवमंदिर आता दिसू लागले आहे. जुने ते सोने असे म्हटले जाते आणि याच जुन्या वास्तूतून जुन्या आठवणींना अनेक वर्षांनंतर पुन्हा उजाळा मिळत आहे.
पुणे जिल्ह्यातील सह्याद्रीच्या कुशीतून वाहणाऱ्या भीमा नदीच्या तीरावर वाडा हे गाव वसलेले आहे. १९७२ साली दुष्काळाचे संकट आल्यानंतर चासकमान हा जलाशय उभारण्यात आला. त्यानंतर याच वाड्यांसह अनेक गावांचा परिसर पाण्याखाली गेला. पाण्याखाली गेलेल्या वाडा गावातील एकमेव आठवण म्हणून हे प्राचीनकालीन शिवमंदिर आहे. सध्या दुष्काळी परिस्थितीमुळे चासकमान धरणातील पाणीसाठा कमी झाला आहे. त्यामुळे पाण्याखाली गेलेले गाव, मंदिर पुन्हा दिसू लागले आहे. त्यामुळे या गावात राहणाऱ्या नागरिकांच्या जुन्या आठवणींना पुन्हा उजाळा मिळाला आहे.
दुष्काळी संकटामुळे या गावच्या आठवणींना उजाळा मिळत असला तरी या परिसरातील गावांना पाणीटंचाईचे मोठे संकट आहे. सुरुवातीपासूनच पावसाचे प्रमाण कमी पाहायला मिळाले. त्यातच पाण्याचे योग्य नियोजन नसल्यामुळे धरणातील पाणीसाठा संपुष्टात आला आहे. त्यामुळे सध्याच्या परिस्थितीत जुन्या आठवणी समोर येत असताना पूर्वीचा दुष्काळ पुन्हा डोळ्यासमोर उभा राहिला आहे.
वाडा हे गाव खेड तालुक्यातील पश्‍चिम भागातील मुख्य बाजारपेठ म्हणून ओळखले जाते. या गावची बाजारपेठ, गावची शाळा, जत्रा, यात्रा, उत्सव, अशा अनेक गोष्टी नागरिकांच्या डोळ्यांसमोर उभे राहतात. मात्र, आता या जुन्या वाडा गावच्या आठवणी म्हणून फक्त प्राचीन शिवमंदिर उभे आहे. मागील अनेक वर्षांपासून पाण्याच्या आधारावर असलेले हे मंदिर आजही भक्कमपणे उभे आहे. असे म्हणतात 'देवाची करणी आणि नारळात पाणी' याचा प्रत्यय या मंदिराकडे पाहिल्यावर येतो.
