पिंपरी-चिंचवड (पुणे) - शहरात कोरोनाचा प्रादुर्भाव दिवसेंदिवस वाढत चालला आहे. पिंपरी-चिंचवड पोलीस आयुक्तालयाअंतर्गत येणाऱ्या पोलीस ठाण्यांतही कोरोना बाधितांची संख्या वाढत आहे. बुधवारी (दि. 8 जुलै) दिवसभरात 27 पोलीस कर्मचाऱ्यांचा कोरोना अहवाल पॉझिटिव्ह आल्याने खळबळ उडाली आहे. यात दोन पोलीस उपनिरीक्षक दर्जाच्या अधिकाऱ्यांचा समावेश आहे, अशी माहिती पोलिसांकडून देण्यात आली आहे.
पिंपरी-चिंचवड पोलीस आयुक्तलयातील बाधित पोलिसांची एकूण संख्या 95 वर पोहचली असून त्यापैकी 31 जण बरे झाले आहेत. तर 64 बाधित पोलीस कर्मचारी आणि अधिकाऱ्यांवर खासगी रुग्णालयात उपचार सुरू आहेत.
बुधवारी दिवसभरात 27 पोलीस कर्मचारी आणि अधिकाऱ्यांचे कोरोना अहवाल पॉझिटिव्ह आले आहेत. त्यामध्ये दोन पोलीस उपनिरीक्षक दर्जाच्या अधिकाऱ्यांचा समावेश आहे. कोरोनाच्या पार्श्वभूमीवर सुरू असलेल्या टाळेबंदीत पोलीस कर्मचारी हे दिवसरात्र आपले कर्तव्य बजावत आहेत. मात्र, त्यांच्याच भोवती कोरोना विळखा घालत असल्याचे अधोरेखित होत आहे. सर्वसामान्य जनतेचा रक्षकच आता कोरोनाच्या संकटात सापडला असल्याचे स्पष्ट होत आहे.
हेही वाचा - आयटी हब हिंजवडीत आठ दिवस कडकडीत लॉकडाऊन; आयटी कंपन्यांना मुभा
