जिल्हा रुग्णालयातील अधिकाऱ्यांच्या असमन्वयाचा नागरिकांना फटका; खासदार संजय जाधवांचा आरोप

गेल्या वर्षभरापासून राज्यात कोरोनाने धुमाकूळ घातला आहे. जिल्हा प्रशासनाने अथक प्रयत्न करून कोरोना आटोक्यात आणण्याचा प्रयत्न केला होता. त्यात त्यांना यशही आले होते. मात्र, गेल्या काही दिवसांपासून परभणीमध्ये पुन्हा कोरोना रूग्णांच्या संख्येत वाढ होताना दिसत आहे. या पार्श्वभूमीवर खासदार संजय जाधव यांनी जिल्हा रूग्णालयाची पाहणी केली.

परभणी - 'जिल्हा रुग्णालयातील वैद्यकीय अधिकाऱ्यांमध्ये समन्वय नसून, याचा फटका नागरिकांना बसत आहे. जिल्हा रुग्णालयातील 15 कर्मचारी कोरोनाबाधित आहेत. त्यांच्याकडे या ठिकाणचे वैद्यकीय अधिकारी लक्ष देत नाहीत तर, सामान्यांचे काय रक्षण करणार? असा प्रश्न खासदार संजय जाधव यांनी उपस्थित केला आहे. जिल्हा रूग्णालयातील एका रूग्णाला ऑक्सिजन न मिळाल्याने त्याचा मृत्यू झाल्याचा प्रकार शनिवारी पहाटे घडला. त्यानंतर खासदार संजय जाधव, जिल्हाधिकारी व पोलीस अधीक्षकांनी संपूर्ण जिल्हा रूग्णालयाची पाहणी करून अधिकाऱ्यांची कानउघडणी केली.

परभणीच्या जिल्हा रुग्णालयातील 'सारी' वार्डात शनिवारी पहाटे एका 65 वर्षीय रूग्णाचा ऑक्सिजन अभावी तर अन्य एका रूग्णाचा उपचाराअभावी मृत्यू झाला. रूग्णालयातील कर्मचाऱ्यांच्या निष्काळजीपणामुळे हे मृत्यू झाल्याचा आरोप करत नातेवाईकांनी गोंधळ घातला आणि कर्मचाऱ्यांना मारहाण केली. या पार्श्वभूमीवर खासदार संजय जाधव, जिल्हाधिकारी दीपक मुगळीकर यांनी जिल्हा रूग्णालयात शनिवारी दुपारी बैठक घेऊन जिल्हा शल्य चिकित्सकांसह इतर वैद्यकीय अधिकार्‍यांना धारेवर धरले.

जिल्हा रुग्णालयाची अत्यंत दयनीय अवस्था -

शनिवारी पहाटे घडलेल्या प्रकारामुळे जिल्हाधिकारी, पोलीस अधीक्षकांसह मी जिल्हा रुग्णालयाची पाहणी केली. रूग्णालयाची अत्यंत दयनीय अवस्था झाल्याचे या पाहणीत दिसले. या ठिकाणी कोरोनाबाधित रूग्णांना उपचार न मिळाल्याने तो दगावल्याचा आरोप त्याच्या नातेवाईकांनी केला आहे. त्यामुळे त्यांनी या ठिकाणी धुडगूस घालून काही कर्मचाऱ्यांना मारहाण केली. त्यांच्या म्हणण्यानुसार कॉल करून देखील डॉक्टर वेळेवर आले नाही, म्हणून रूग्ण दगावला. लोकांची ही प्रतिक्रिया नैसर्गिक आहे. मात्र, जिल्हा रुग्णालयात जे कोणी वैद्यकीय अधिकारी असतील त्यांनी आपली नैतिक जबाबदारी पार पाडली असती तर असले प्रकार झाले नसते, असे खासदार जाधव म्हणाले.