परभणी - मुख्यमंत्री उद्धव ठाकरे यांनी पाथरी येथील साईबाबा जन्मस्थळाच्या वादावर पडदा टाका, अशी सूचना खासदार संजय जाधव यांना काल (दि. 22 जानेवारी) दिल्यानंतर आज (दि. 23 जानेवारी) पाथरीत साई जन्मस्थळ समितीचे अध्यक्ष आमदार बाबाजानी दुर्रानी यांनी या प्रकरणी न्यायालयात जाऊन न्यायालयासमोर पुरावे सादर करू आणि न्यायालयाच्या माध्यमातून शासनाला संशोधन समिती स्थापन करण्यास भाग पाडू, असा इशारा दिला आहे.
मागील महिन्यात मुख्यमंत्री उद्धव ठाकरे यांनी औरंगाबाद दौऱ्यात साई जन्मस्थळ असलेल्या पाथरीत विकासासाठी शंभर कोटी रुपयांच्या विकास आराखड्याला मंजुरी दिल्याची घोषणा केली होती. त्यानंतर शिर्डीवासियांनी साई जन्मस्थळावरून वाद निर्माण केला. एवढेच नव्हे तर, याच्या निषेधार्थ शिर्डी बंद ठेवली. त्यामुळे मुख्यमंत्री उद्धव ठाकरे यांनी शिर्डीच्या शिष्टमंडळाला भेटून पाथरीला तीर्थक्षेत्र म्हणून विकास निधी दिल्याचे सांगितल्याने शिर्डीकरांनी आंदोलन मागे घेतले. परंतु, या विरोधात परभणीच्या सर्वपक्षीय नेत्यांनी खासदार संजय जाधव यांच्या नेतृत्वाखाली पाथरीत मंगळवारी (दि. 21 जानेवारी) ग्रामसभा घेऊन हा लढा तीव्र करण्याचा निर्णय घेतला.
मुख्यमंत्री उध्दव ठाकरे यांना भेटून आमच्याकडील 29 पुराव्यांचा अभ्यास करण्यासाठी समिती नेमण्याची मागणी करण्याचा निर्णय घेतला. त्यानुसार काल (दि. 22 जानेवारी) खासदार संजय जाधव यांनी मुख्यमंत्री उद्धव ठाकरे भेट घेतली. पण, मुख्यमंत्र्यांनी पाथरीवासियांना दिलासा देण्याऐवजी या मुद्द्यावर पडदा टाका, अशी सूचना दिल्याने पाथरीमध्ये तीव्र प्रतिक्रिया उमटल्या. त्यानुसार आज साईजन्मस्थळ मंदिर कृती समितीचे अध्यक्ष आमदार बाबाजानी दुर्रानी यांनी या प्रकरणी आपण न्यायालयाचे दार ठोठावणार असल्याचे सांगितले.
हेही वाचा - एनआरसी विरोध; दिल्लीतील आंदोलनाला परभणीत पाठिंबा, बेमुदत धरणे आंदोलन सुरूच
शिर्डी ही साईबाबांची कर्मभूमी आहे, त्याप्रमाणेच पाथरी देखील जन्मभूमी आहे. हे कोणीही नाकारू शकत नाही, त्यासाठीचे तब्बल 29 सबळ पुरावे आमच्याकडे आहेत. आम्ही हे पुरावे घेऊन न्यायालयात जाऊ. शासनाने समिती नेमावी, अशी मागणी न्यायालयात करणार आहे. एकूणच आता शासनाकडे दाद न मिळाल्याने पाथरीकर न्यायालयाचे दार ठोठावणार असल्याने याकडे सर्वांचे लक्ष लागले आहे.
हेही वाचा - 'पाथरी हीच साईबाबांची जन्मभूमी, दावा कधीही सोडणार नाही'
