परभणी - शेतकऱ्यांना खरीप हंगामातील पीक विमा भरताना काही तलाठ्यांकडून अडवणूक केली जात आहे. कधी सातबारा तर कधी होल्डींगसाठी जादा रकमेची मागणी, तर कधी सक्तीची शेतसारा वसुली करत शेतकऱ्यांना वेठीस धरण्याचे प्रकार होत असल्याने शेतकरी वैतागले आहेत. याबाबत काँग्रेसने बुधवारी गंगाखेडच्या उपविभागीय अधिकारी कमलाकर फड यांची भेट घेवून ही अडवणूक थांबवण्यासाठीची मागणी केली.
पंतप्रधान पीक विमा योजनेअंतर्गत खरीप हंगामातील पीक विमा भरण्यास सुरुवात झाली आहे. शेवटची तारीख २४ जुलै असून ही मुदत वाढण्याची शक्यता आहे. परंतू सध्याच्या परिस्थितीत पाऊस दगा देत असल्याने पीक विमा भरणा केंद्रावर शेतकऱ्यांची गर्दी होत आहे. मात्र याचा तलाठी कार्यालयात काम करणाऱ्या काही सहाय्यकांकडून गैरफायदा घेत सातबारासाठी जादा रक्कम उखळल्या जात आहे. तसेच काही तलाठी शेतसारा वसुलीचे ऊद्दीष्टही या निमित्ताने पूर्ण करून घेत आहेत. या संदर्भातील तक्रारी यादव यांच्याकडे आल्या होत्या. त्यामुळे शेतकऱ्यांच्या शिष्टमंडळासोबत गोविंद यादव यांनी उपविभागीय अधिकारी फड यांचे निवासस्थान गाठले. यासंदर्भात आजच गंगाखेड, पालम आणि पुर्णा तालु्क्यातील संबंधीत अधिकाऱ्यांना ताकीद दिली जाईल, अशी ग्वाही फड यांनी दिल्याची माहिती काँग्रेसचे जिल्हा प्रवक्ते गोविंद यादव यांनी दिली. त्यांच्यासोबत धनगर साम्राज्य सेनेचे अध्यक्ष सखाराम बोबडे व शेतकरी उपस्थित होते.
महसूल संघटनेचे जिल्हाध्यक्ष नानासाहेब भेंडेकर यांनी या संदर्भात तात्काळ उपलब्ध करून दिलेले शासन परिपत्रके यावेळी फड यांना सादर करण्यात आले. त्यांनीही या तक्रारींची दखल घेत शेतकऱ्यांची अडवणूक करणाऱ्यांवर कारवाईचे संकेत दिले. असे प्रकार होत असल्यास शेतकऱ्यांनी तलाठी व संबंधीतांच्या तक्रारी लेखी स्वरूपात दाखल कराव्यात, असे आवाहन फड यांनी केले. गोविंद यादव यांनीही शेतकऱ्यांनी अशा अडचणींसंदर्भात आपल्याशी संपर्क साधण्याचे आवाहन यावेळी प्रसार माध्यमांशी बोलताना केले.
यावेळी गोविंद यादव, सखाराम बोबडे, सोपान ताटे, ईसादचे सरपंच सिद्धार्थ भालेराव, मसनेरवाडीचे सरपंच जयदेव मिसे, नरळद येथील शैलेश ढेरे, बालासाहेब लोमटे, सुभाषराव गाढवे, ओंकार चने, हरंगूळ येथील इंद्रजीत हाके, बोर्डा येथील लटपटे, निळकंठ देवकते आदी शेतकरी उपस्थित होते.
