परभणी - पाथरी ही साईबाबांची जन्मभूमी असून आम्ही याबाबतचा दावा कधीही सोडणार नाही. मुख्यमंत्र्यांनी साईबाबांचा जन्म कुठे झाला, कधी झाला याचा शोध घेण्यासाठी समिती नेमावी, असे आवाहन पाथरीत साईबाबा जन्मस्थळ कृती समितीचे अध्यक्ष आणि आमदार बाबाजानी दुर्रानी यांनी केले. 'दूध का दूध-पानी का पानी' होऊ द्या म्हणजे साईबाबांच्या जन्मावरून पुन्हा कुठलाही वाद होणार नाही, असे परखड मतही त्यांनी यावेळी व्यक्त केले.
हेही वाचा - 'बाबांच्या नामस्मरणामुळे मनातील द्वेष निघून जातो' पाथरीकरांनी दररोज महाआरती करावी, शिर्डीकरांचा सल्ला
मुख्यमंत्री उद्धव ठाकरे यांनी मराठवाड्याच्या दौऱ्यावर असताना साई जन्मभूमी पाथरी असल्याचे वक्तव्य केले होते. याला आक्षेप घेत शिर्डीकरांनी बंद पुकारून मुख्यमंत्र्यांची भेट घेतली होती. या भेटीनंतर मुख्यमंत्र्यांनी पाथरीला साई जन्मस्थळ म्हणून नव्हे तर तीर्थक्षेत्र म्हणून निधी दिल्याचे सांगितले होते. यावरून आता नव्या वादाला तोंड फुटले आहे.
हेही वाचा - पाथरी जन्मस्थान तर शिर्डीला साईंची समाधी - प्रताप पाटील-चिखलीकर
साईबाबांची जन्मभूमी पाथरीच आहे, हे जगाला आणि शासनाला पटवून देण्यासाठी परभणीतील सर्वपक्षीय नेते आणि लोकप्रतिनिधी एकवटले आहेत. यातूनच आज पाथरी येथे साई जन्मभूमी मंदिराच्या सभागृहात आमसभा घेण्यात आली. यावेळी कृती समितीचे अध्यक्ष म्हणून भूमिका मांडताना आमदार बाबाजानी दुर्रानी यांनी शिर्डीकरांवर कडाडून टीका केली. 'साईबाबांनी जात, धर्म सांगितलेला नाही, असे शिर्डीकर म्हणतात. पण आम्ही म्हणतो साई बाबांचा जन्म कुठे झाला? या मुद्द्यावर तुम्ही बोला. साईबाबांचा जन्म पाथरीत झाला नसेल, तर कुठे झाला याचे पुरावे द्या' असे आव्हान दुर्रानी यांनी दिले.
हेही वाचा - ...म्हणून शिर्डीकरांचा पाथरीला विरोध; परभणीतील साईभक्तांचा आरोप
साईबाबांच्या जन्मस्थळाचे पुरावे शिर्डीकरांनी गहाळ केल्याचा आरोप दुर्रानी यांनी यावेळी केला. पाथरी साईबाबांची जन्मभूमी असल्याचे २९ पुरावे असल्याचा पुनरुच्चारही त्यांनी केला. साईबाबांचा जन्म पाथरीत झाला, ही 'काळ्या दगडावरची पांढरी रेष आहे', असेही शेवटी आमदार दुर्रानी म्हणाले. या सभेच्या व्यासपीठावर खासदार संजय जाधव, आमदार डॉ. राहुल पाटील, सुरेश वरपुडकर, माजी आमदार मोहन फड, मंदिर संस्थानचे अध्यक्ष सखाराम धानु, विश्वस्त संजय भुसारी, जिल्हा परिषदेचे अध्यक्ष, सदस्य तसेच अन्य पदाधिकारी उपस्थित होते.
