सामूहिक कॉपी चालणाऱ्या शाळेतील 11 शिक्षकांवर कारवाई ; परभणी झेडपी सीईओंचा दणका

या ठिकाणी काही अनाधिकृत शिक्षक, वसतिगृह कर्मचारी यांच्या माध्यमातून परीक्षेदरम्यान अनियमितता व गैरप्रकार होत असल्याचे पथकास आढळून आले. काही कर्मचारी विद्यालयाच्या वरच्या मजल्यावर एक रूम बंद करून बाहेर पहारा देत असल्याचेही सापडले.

परभणी - जिल्हा परिषदेचे सीईओ पृथ्वीराज बी. पी. यांनी पूर्णा तालुक्यातील एरंडेश्वर येथील हायटेक विद्यालयात धडक कारवाई केली. १० वीच्या परीक्षेदरम्यान होत असलेल्या सामूहिक कॉपीचा प्रकार उघडकीस आणला. या प्रकारास जबाबदार असलेल्या केंद्रसंचालकासह ११ जणांवर गुन्हा दाखल करण्याचे आदेश सीईओंनी दिले. यामुळे शैक्षणिक वर्तुळात खळबळ उडाली आहे.

सध्या सुरू असलेल्या दहावीच्या परीक्षेदरम्यान बुधवारी भूमितीचा पेपर होता. जिल्हा परिषदेचे मुख्य कार्यकारी अधिकारी बी. पी. पृथ्वीराज यांच्या नेतृत्वात भरारी आणि बैठ्या पथकाने एरंडेश्वर येथील हायटेक विद्यालय या परीक्षा केंद्राला अचानक भेट दिली. परीक्षा सुरू असताना सीईओ बी. पी. पृथ्वीराज यांच्यासह पथकातील गटविकास अधिकारी एस. आर.कांबळे, औरंगाबाद विभागाचे अधीक्षक ए.बी.जाधव, पर्यवेक्षक के.एम.अंबुलगेकर, एस. डी. ससाणे यांचे भरारी पथक आणि बैठे पथकातील ज्योती गऊळकर, बी.एल.रब्बेवार, जी.डी गायकवाड, एस.के.बंडेवाड परीक्षा केंद्रात पोहोचले.

या ठिकाणी काही अनाधिकृत शिक्षक, वसतिगृह कर्मचारी यांच्या माध्यमातून परीक्षेदरम्यान अनियमितता व गैरप्रकार होत असल्याचे पथकास आढळून आले. काही कर्मचारी विद्यालयाच्या वरच्या मजल्यावर एक रूम बंद करून बाहेर पहारा देत असल्याचेही सापडले. या रूममध्ये गैरप्रकार होत असल्याचे तपासणीत समोर आले. हा प्रकार सीईओ बी. पी. पृथ्वीराज आणि त्यांचा पथकास धक्का देणारा ठरला. हा सर्व प्रकार लक्षात आल्यानंतर पथकाने तात्काळ कारवाई सुरू केली.