परभणी - लोकसभा निवडणुकीसाठी नामनिर्देशन पत्र दाखल केलेल्या एकूण २७ उमेदवारांच्या ३८ अर्जांपैकी ६ अर्ज नामंजूर झाले आहेत. विशेष म्हणजे आज एका उमेदवाराने आपला अर्ज मागे घेत निवडणुकीतून माघार घेतली. त्यामुळे आता परभणीच्या लोकसभा निवडणूक रिंगणात २० उमेदवार शिल्लक असल्याची माहिती मुख्य निवडणूक अधिकारी तथा जिल्हाधिकारी पी. शिवाशंकर यांनी दिली आहे.
परभणीच्या जिल्हाधिकारी कार्यालयात सायंकाळी पत्रकार परिषद घेण्यात आली. यावेळी मुख्य निवडणूक निरीक्षक राजेंद्र कुमार सिंग, जिल्हाधिकारी पी. शिवा शंकर, अप्पर जिल्हाधिकारी विशंभर गावंडे, निवासी उपजिल्हाधिकारी अंकुश पिनाटे, निवडणूक उपजिल्हाधिकारी महादेव किरवले आदी उपस्थित होते. परभणी मतदार संघासाठी काल, मंगळवारी (२६ मार्च) अर्ज दाखल करण्याची अंतिम तारीख होती. त्यानुसार कालपर्यंत २७ उमेदवारांनी ३८ नामनिर्देशन पत्र दाखल केले होते. आज (गुरुवारी) या अर्जांची छाननी करण्यात आली. यामध्ये ६ अर्ज विविध त्रुटीमुळे नामंजूर झाले आहेत. तसेच २७ पैकी एका उमेदवाराने आजच आपला उमेदवारी अर्ज मागे घेतला आहे. त्यामुळे २० उमेदवार परभणीच्या निवडणूक रिंगणात शिल्लक राहिले आहेत.
दरम्यान उमेदवारांना देण्यात आलेल्या ७० लाख रुपयांच्या खर्च मर्यादेचे व्यवस्थित पालन करून त्याचा हिशोब वेळोवेळी दिला पाहिजे, त्यासाठी उमेदवारांच्या प्रतिनिधींना मार्गदर्शन केल्याचे निवडणूक निरीक्षक सिंग यांनी सांगितले. याशिवाय जिल्ह्यातील ५४ आणि एकूण मतदार संघातील ९६ मतदान केंद्रे संवेदनशील असल्याची माहिती अपर जिल्हाधिकारी विश्वंभर गावंडे यांनी दिली. यामध्ये सर्वाधिक संवेदनशील केंद्र घनसावंगी विधानसभा मतदारसंघात ३९ येवढे आहेत. तसेच आत्तापर्यंत आचारसंहिता भंग केल्याचे ७ गुन्हे दाखल झाले आहेत. तर सी व्हिजील या अॅपवर १५ तक्रारी आल्या असून त्यापैकी एक गुन्हा दाखल झाला आहे.
'या' उमेदवारांचे अर्ज झाले नामंजूर
अर्ज नामंजूर झालेल्या उमेदवारांमध्ये पंढरीनाथ वाघमारे, बाळासाहेब हरकल, उद्धव पवार, राजेंद्र पगारे, सिद्धेश्वर पवार आणि संजय परळीकर यांचा समावेश आहे. या उमेदवारांच्या अर्जांमध्ये विविध प्रकारच्या त्रुटी आढळल्याने त्यांचे अर्ज नामंजूर करण्यात आल्याची माहिती यावेळी देण्यात आली.
