वसई - ग्राहकांच्या जीवाशी जीवघेणा खेळ खेळला जात असल्याचे नुकतेच समोर आले आहे. वसईतील दोन डेअऱ्यांमध्ये बनावट आणि भेसळयुक्त पनीर बनवले जात होते, असे पोलिसांच्या तपासात उघड झाले आहे. पोलिसांनी या दोन्ही डेअरींवर बुधवारी छापा टाकला. येथून साडेसात लाख किमतीचे अडीच हजार किलो पनीर जप्त करण्यात आले
वसई विरार शहरातील अनेक उपहार गृहे, रिसॉर्ट आणि ढाब्यामध्ये हे बनावट पनीर वितरीत केले जात होते. चिंचोटी कामण रोडवर असलेल्या अजय आणि साईनाथ डेअरी या दोन ठिकाणी हे पनीर बनवले जात असे. तसेच, याठिकाणी अन्न सुरक्षेच्या कुठल्याही नियमांचे पालन केले जात नव्हते. अत्यंत अस्वच्छ वातावरणात पनीर बनविण्यात येत होते. याची माहिती मिळताच पोलिसांनी छापा टाकला.
अजय डेअरी येथे अंदाजे ७०० किलो आणि साईनाथ डेअरी येथे १८०० किलो असे एकुण अडीच हजार किलो पनीर आणि पनीर बनविण्याचे साहित्य जप्त करण्यात आले आहे. त्याची किंमत साडेसात लाख रुपये आहे.
अन्न व औषध प्रशासनाच्या अधिकाऱयांनी पनीरचे नमुने तपासणीसाठी ताब्यात घेतले आहेत. या दोन्ही डेअरीचे युनिट बंद करण्याची कारवाई करण्यात येणार असल्याचे अन्न व औषध प्रशासनाच्या अधिका-यांनी सांगितले. पोलीस अधीक्षक गौरव सिंग, अतिरीक्त पोलीस अधीक्षक विजयकांत सागर यांच्या पथकाने ही कारवाई केली.
