उस्मानाबाद - शहरातून जाणाऱ्या तुळजापूर-औरंगाबाद या मार्गासह इतर रस्त्यांवर फिरणाऱ्या मोकाट जनावरांचे प्रमाणात वाढले आहे. ही जनावरे रस्त्यावरच ठाण मांडत असल्याने वाहतुकीला अडथळा निर्माण होतो. यामुळेच लहान-मोठे अपघातही घडत आहेत.
मोकाट जनावरे पकडण्यासाठी पालिकेने पथक नेमले आहे. मात्र, मोकाट जनावरांचा उपद्रव कमी झालेला नाही. त्यामुळे उस्मानाबाद नगरपालिकेत झालेल्या सर्वसाधारण सभेत मोकाट जनावरांच्या मालकांविरुद्ध खटले भरण्याचा निर्णय घेण्यात आला. नगराध्यक्ष मकरंद राजे निंबाळकर यांच्या अध्यक्षतेखाली झालेल्या बैठकीत मोकाट जनावरांचा मुद्दा उपस्थित झाला. मागील बैठकीत झालेल्या निर्णयानुसार मोकाट जनावरे पकडण्यासाठी पालिकेचे पथक नेमले. त्यानुसार कार्यवाही देखील करण्यात आली.
हेही वाचा - करमाळ्यात 24 लाखांचा गुटखा जप्त; करमाळा पोलिसांची कारवाई
मात्र, मोकाट जनावरांवर कारवाई केल्यानंतर संबंधित मालक पुन्हा जनावरे सोडून देत आहेत. त्यामुळे हा प्रश्न कायम असल्याचे काही सदस्यांनी मकरंद राजे निंबाळकर यांच्या निदर्शनास आणून दिले. यानंतर नगराध्यक्ष राजे निंबाळकर यांनी जनावरांच्या मालकांविरुद्धच गुन्हा दाखल करण्याचे आदेश पालिकेच्या पथकाला दिले.
