उस्मानाबाद - गांधींच्या पेहरावात प्रचार करण्यासाठी ओळखले जाणारे मनोहर पाटील हे वाराणसीमधून निवडणूक लढणार आहेत. याआधी त्यांनी उस्मानाबादमधून अर्ज दाखल केला होता. पण, छाननीमध्ये त्यांचा अर्ज बाद झाला होता. त्यामुळे त्यांनी आता वारणसीतून निवडणूक लढण्याचा निर्णय घेतला आहे. मनोहर पाटील १९९९ पासून वेगवेगळ्या निवडणुका लढवत आहेत. त्यांना एकदा राष्ट्रपतीपदाची निवडणूक देखील लढवली आहे.
मनोहर आनंद पाटील हे औसा तालुक्यातील मंगरुळ गावाचे रहिवासी आहेत. भारतीय सीमेवरती आर्मड फोर्सेसमध्ये रायफल विभागात ते कार्यरत होते. निवृत्तीनंतर ते गावात परतले. १९९३ च्या भूकंपात त्यांनी सर्व कुटूंब गमावले. या भूकंपात त्यांचे आई, वडील, भाऊ, बायको, मुले या सर्वांचा मृत्यू झाला. तेव्हापासून पाटील एकाकी जीवन जगतात. पेन्शचे पैसे ते झाडे लावण्यासाठी आणि प्रदुषणमुक्तीचा संदेश देण्यासाठी खर्च करतात असे ते सांगतात.
मनोहर पाटील हुबेहुब महात्मा गांधींसारखा पेहराव करतात. धोतर, पंचा, कमरेला घड्याळ, डोळ्यावर चष्मा असा पेहराव करुन पाटील प्रत्येक ठिकाणी हजर राहतात. आतापर्यंत आण्णा हजारेंची आंदोलने, इतर सामाजिक आंदोलनात त्यांनी अशाच पेहरावात हजेरी लावली आहे. १९९९ पासून ते प्रत्येक लोकसभा आणि विधानसभा निवडणूक लढवत आहेत. एकवेळ राष्ट्रपतीपदाची निवडणूकही ते लढले आहेत.
गांधींच्या पेहरावात पाटील आठवडी बाजार, बस स्थानकावर जाऊन प्रचार करतात. त्यांच्या या पेहरावाने ते लोकांचे लक्ष वेधून घेतात. आतापर्यंत लढवलेल्या एकाही निवडणुकीत माझे डिपॉझीट जप्त झाले नाही, असे पाटील सांगतात. या निवडणुकीतही त्यांनी अर्ज भरला होता. पण, छाननीमध्ये त्यांचा अर्ज बाद ठरवण्यात आला. त्यामुळे आता ते थेट मोदींच्या विरोधात वाराणसीमधून लढवण्याची तयारी करत आहेत.
