नाशिक : आठ दिवसांपूर्वी मुलीच्या वादातून मुलीचे नातेवाईक अनिल दिनकर माळी याने गणेश माळी याला मारहाण केली होती. याचा वचपा काढण्यासाठी गणेश माळी याने अनिल माळीला कविता नामक मुलीचा मोबाईल नंबर असल्याचे भासवत व्हाट्सअपवर तीन दिवस मेसेज केले आणि सकाळी लासलगाव बस स्थानकावर भेटण्यासाठी बोलवले. यामुळे अनिल माळी व त्याचा मित्र पल्सर (MH15 BQ 4326) या मोटरसायकलवरून आले. बस स्थानकाच्या आवारात उभे असताना अनिल माळी याचे व्हॅन क्रमांक (MH 02 AV 1906) मधून अपहरण करत लासलगाव रेल्वे गेट जवळील साईनगर येथे काटेरी झुडपात उतरून दिले. यानंतर आरोपी गणेशने त्याच्या साथीदारासोबत मिळून अनिलला लोखंडी रॉड आणि लाथा बुक्क्यांनी जबर मारहाण केली. यानंतर अनिल माळीला सोडून देत आरोपी गणेशने पळ काढला.
अपहरण आणि दंगलीचा गुन्हा दाखल : लासलगाव पोलिसांना घटनेची माहिती मिळताच घटनास्थळी पोलीस पथक दाखल होत लासलगाव बस स्थानकावरील सीसीटीव्ही कॅमेऱ्याच्या मदतीने घटनेचा तपास सुरू केला. चार तासात या घटनेचा तपास लावल्यात लासलगाव पोलिसांना यश आले. याप्रकरणी अनिल माळी या फिर्यादीच्या जबाबावरून लासलगाव पोलीस ठाण्यात सात जणांवर अपहरण व दंगलीचा गुन्हा दाखल करण्यात आला.
या आरोपींना पोलिसांनी घेतले ताब्यात : यात आरोपी गणेश माळी (रा. नगरसूल येवला तालुका), सौरभ ठाकरे (रा. नगरसूल येवला तालुका), विशाल पवार (रा. नगरसूल येवला तालुका), विठ्ठल गवळी (रा. पिंपळगाव नजीक निफाड तालुका) यांना ताब्यात घेण्यात आले. रविंद्र पवार (रा. नगरसूल येवला तालुका), शंकर माळी (रा. नगरसूल येवला तालुका) व विठ्ठल गवळी याचा साथीदार अद्यापही फरार आहे. तिघांचा पोलीस शोध घेत आहे. मुलीच्या वादातून अनेकदा अपहरण आणि खूनाच्या घटना घडल्या आहे. ज्याचा पोलिसांनी शिताफीने तपास करत उलघडा केला आहे.
अनैतिक संबंध उठताहेत जीवावर : महिला, मुलगी आणि प्रेम प्रकरणातून अपहरण आणि हत्येच्या अनेक घटना चालू आठवड्यात महाराष्ट्रात घडल्या आहेत. यापैकीच ठाणे जिल्ह्यातील प्रकरण ताजे आहे. यामध्ये शाळेतून घरी येत असताना ७ वर्षांच्या चिमुरड्याचे त्याच्या आईच्या मित्राने अपहरण केले. त्यानंतर चिमुरड्याची हत्या करून त्याचा मृतदेह इमारतीच्या गच्चीवरील पाण्याच्या टाकीत फेकून दिला. ही घटना कल्याण पश्चिमेकडील सुंदर रेसिडेन्सी इमारतीच्या गच्चीत घडली आहे. याप्रकरणी खडकपाडा पोलीस ठाण्यात अपहरणासह हत्येचा गुन्हा दाखल करताच, पोलिसांनी नितीन कांबळे नामक आरोपीला अटक केली. प्रणव भोसले असे हत्या झालेल्या दुर्दैवी चिमुरड्याचे नाव आहे. या घटनेने ठाणे जिल्ह्यात एकच खळबळ माजली.
शाळेत जाऊन केले मुलाचे अपहरण : कल्याण पश्चिम भागातील सुंदर रेसीडन्सी इमारतीच्या बी विंगमध्ये काही महिन्यापूर्वीच आरोपी नितीन कांबळे हा सुरक्षा रक्षक म्हणून कार्यरत होता. यादरम्यान मृतक प्रणव याची आई कविता बरोबर त्याची मैत्री झाली. त्यातच गेल्या काही दिवसांपासून आरोपी व मृतकच्या आईचे वाद सुरू होते. ९ जानेवारी रोजी सकाळच्या सुमारास आरोपी नितीनने प्रणव शाळेतून निघाल्यानंतर शाळेच्या गेटवरून बहाण्याने त्याचे अपहरण केले. त्यानंतर दुपारी १ वाजताच्या सुमारास प्रणवची गळा दाबून हत्या केल्यानंतर त्याचा मृतदेह इमारतीच्या गच्चीवर नेत पाण्याच्या टाकीत फेकून दिला.
हेही वाचा : Jharkhand Crime News : मेहुणीशी एकतर्फी प्रेम..पतीने दारुच्या नशेत केली पत्नीची हत्या!
