नाशिक - शहरात एका अल्पवयीन रिक्षा चालकाने मोबाईलमधील अर्धनग्न फोटो व्हायरल करण्याची धमकी देत एका अल्पवयीन मुलीवर बलात्कार केल्याची घटना घडली आहे. विशेष म्हणजे ३ दिवसांपूर्वीही अशीच एक घटना शहरात घडली होती.
जेलरोड परिसरात राहणाऱ्या अल्पवयीन रिक्षा चालकाने २६ मार्चला कॉलेजमधून घरी जाणाऱ्या पीडित मुलीचा पाठलाग केला. तिला रिक्षात बसवून मारहाण करत बळजबरीने तिचे अर्धनग्न फोटो काढले. यानंतर त्या रिक्षा चालकाने ३० मार्चला हे फोटो व्हायरल करण्याची धमकी देत तिच्यावर लैंगिक अत्याचार केला. घटनेनंतर पीडितेने नाशिक रोड पोलीस ठाण्यात याची तक्रार नोंदवली.
या प्रकरणी पोलिसांनी रिक्षा चालकावर बलात्कार आणि पॉक्सो कायद्यांतर्गत गुन्हा दाखल करून त्याला ताब्यात घेतले आहे. गुन्हात संशयिताने वापरलेली रिक्षाही पोलिसांनी जप्त केली आहे. गुण्ह्याचा तपास सहाय्यक पोलीस निरीक्षक मनीषा राऊत करत आहेत.
तीन दिवसांपूर्वी पंचवटीतील पेठरोडवर रिक्षाचालकाने आपल्या मित्राच्या साथीने एका विवाहितेवर बलात्कार केला होता. ही घटना ताजी असतानाच, आता ही घटना समोर आल्याने रिक्षावाल्यांची गुंडगिरी आता चर्चेचा विषय ठरत आहे.
