नाशकात रंगली सखाराम वस्ताद कुस्ती स्पर्धा; महिला गटात प्रज्ञा बिरछेकडून मानसी कहार चीतपट

नाशकात सखाराम वस्ताद कुस्ती स्पर्धा चांगलीच रंगली होती. लेखा नगर भागातील मैदानावर या कुस्ती स्पर्धेचे आयोजन करण्यात आले होते. स्पर्धेत सर्व वयोगटातील पहिलावानांनी सहभाग नोंदविला होता.

नाशिक - जिल्ह्यात रंगलेल्या सखाराम वस्ताद कुस्ती स्पर्धेत नामवंत पैलवानांचा सहभाग दिसून आला. लेखा नगर भागातील मैदानावर या कुस्ती स्पर्धेचे आयोजन करण्यात आले होते. याच स्पर्धेत महिला गटात प्रज्ञा बिरछेने मानसी कहारचा पराभव केला आहे.

या स्पर्धेत पुरुष पैलवानांसह साकुर फाट्याच्या प्रज्ञा बिरछेने भगूर येथील मानसी कहारला चितपट करत सर्वांचे लक्ष वेधून घेतले होते. अत्यंत चुरशीच्या झालेल्या या सामन्यात प्रज्ञाने अत्यंत अवघड डावपेच टाकत मानसीचा पराभव केला. प्रज्ञाला चषक आणि रोख रक्कम देऊन गौरविण्यात आले. दुसरीकडे जुन्या नाशकातील पैलवान शरीफ शेख यांनी येवल्याच्या बाळू पैलवानाचा पराभव करत चषक पटकावला. तर युवा पैलवान उदय काकड आणि काशिनाथ भोये यांच्यात झालेल्या चुरशीच्या लढतीत काकड यांनी भोये यांच्यावर मात करत विजय संपादन केला.

श्री काळाराम मंदिर सत्याग्रहपासून ही प्रदिर्घ परंपरा सुरू असून यंदाचे हे 89 वे वर्ष आहे. ज्येष्ठ पैलवान बाळू काकड, शांताराम बागुल, विजय गवळी, रतन सांगळे यांनी पंच म्हणून काम बघितले. तर आनंद सोनवणे, विश्वास ठाकूर, बॉबी काळे, अजित तेजाळे, अजिंक्य तेजाळे, गौतम भालेराव, सतीश सोनवणे, बबलू पठाण उपस्थित होते.