नाशिक - मनमाड जवळील कर्ही गावातील या लष्करी जवानाचा कर्तव्य बजावत असताना अंगावर वीज पडून मृत्यू झाला. मल्हारी खंडेराव लहरे असे या जवानाचे नाव आहे. गुजरातच्या जामनगर येथील शस्त्रागारात ही घटना घडली. मल्हारी यांचे निधन झाल्याचे समजताच कर्ही गावात शोककळा पसरली.
देश सेवेची आवड म्हणून मल्हार 2012 मध्ये लष्करात भरती झाले होते. वेगवेगळ्या ठिकाणी त्यांनी कर्तव्य बजावले. सध्या त्यांची नियुक्ती गुजरातमधील जामनगर येथील एनडीआरटीच्या युनिटमध्ये झाली होती. शस्त्रगाराच्या सुरक्षेच्या बंदोबस्तासाठी उभे असताना अचानक त्यांच्या अंगावर वीज पडल्याने त्यांचा मृत्यू झाला.
हेही वाचा - मानखुर्दमध्ये घरगुती वादातून पतीने केली पत्नीची हत्या
चार वर्षांपूर्वी मल्हारी यांचे लग्न झाले होते. त्यांना दोन वर्षाचा मुलगा आहे. काही दिवसांपूर्वीच त्यांनी फॅमिली कोर्टरमध्ये राहण्यास सुरवात केली होती.
त्यांचे पार्थिव आज (शनिवार) रात्री अकरा वाजता मूळगावी आणण्यात येणार आहे. रविवारी सकाळी दहा वाजता शासकीय इतमामात त्यांच्यावर कर्ही या मूळगावी अंत्यसंस्कार केले जाणार आहेत.
