नामपूर (नाशिक) - येथील ग्रामीण रुग्णालयाच्या वैद्यकीय अधिकाऱ्यांना कोरोनाची लागण झाल्याची माहिती समोर येताच नामपूर परिसरासह संपूर्ण बागलाण तालुक्यात खळबळ उडाली आहे. कोरोनाग्रस्त डॉक्टर मालेगाव येथून ये-जा करतात. त्यांच्या पत्नीलाही करोनाची लागण झाल्याचा अहवाल मालेगाव सामान्य रुग्णालयाच्या अधिकाऱ्यांकडे प्राप्त झाला आहे.
नामपूरच्या वैद्यकीय अधिकाऱ्यांना करोनाची लागण झाल्याप्रकरणी मालेगाव सामान्य रुग्णालयाचे अधीक्षक डॉ. डांगे यांनी व तालुक्यातील वरिष्ठ वैद्यकीय अधिकाऱ्यांनी दुजोरा दिला आहे. दरम्यान नामपूर परिसरातील किती रुग्ण या रुग्णालयात आले-गेले याचा शोध आता तालुका वैद्यकीय अधिकारी व प्रशासन घेत आहे. यानंतर नागरिकांमध्ये भीतीचे वातावरण असून, बागलाण वासियांनी खबरदारी घेण्याबरोबरच सतर्क राहण्याची गरज आहे.
