नाशिक - अन्न औषध प्रशासन विभागाने शुक्रवारी सायंकाळी छापा टाकून 1 कोटी 48 लाख 36 हजार रुपयांचे भेसळयुक्त अन्न पदार्थ जप्त केले आहेत. शहरातील विविध भागांत छापे टाकण्यात आले. यामध्ये अधिकाऱ्यांच्या हातात हे घबाड लागले.
सण-उत्सवाच्या काळात मोठ्या प्रमाणावर भेसळयुक्त खाद्यपदार्थ आणि निकृष्ट दर्जाच्या पदार्थांचा वापर मिठाई बनवण्यात केला जातो. याच पार्श्वभूमीवर गेल्या महिनाभरापासून नाशिकच्या अन्न व औषध प्रशासनाच्या वतीने धडक कारवाई करण्यात येत होती. यात शुक्रवारी करण्यात आलेल्या कारवाईमध्ये अन्न व औषध विभागाच्या वतीने तब्बल एक कोटी 48 लाख 36 हजार रुपयांहून अधिक प्रतिबंधित अन्नपदार्थ आणि भेसळयुक्त मिठाईचा साठा जप्त करण्यात आला आहे.
नाशिक शहरातील विविध ठिकाणी छापे मारून ही कारवाई करण्यात आली असून यात मोठ्या प्रमाणावर अन्न पदार्थ विक्री करणाऱ्या दुकानांच्या तपासण्या करण्यात आल्या. यात तफावत आढळून आलेल्या 34 दुकानांवर तर प्रतिबंधित अन्नपदार्थ बाळगल्याप्रकरणी जवळपास 83 दुकानांवर कारवाई करण्यात आली. नाशिक अन्न व औषध विभागाचे सहआयुक्त सीडी साळुंखे, सहाय्यक आयुक्त परळीकर यांच्या मार्गदर्शनाखाली पथकाने ही कारवाई केली.
