Nashik Drug Case : ड्रग्ज प्रकरणानंतर नाशिक पोलीस सतर्क; परदेशी विद्यार्थ्यांची कसून तपासणी

Nashik Drug Case : ड्रग्ज असल्याच्या संशयावरून परदेशी विद्यार्थ्यांची नाशिक पोलिसांनी झडती घेतली. नाशिकमध्ये एमडी ड्रग्जचा धुमाकूळ सुरू आहे. तसंच शहरातील काही शैक्षणिक संस्थांमध्ये परदेशी विद्यार्थी ड्रग्ज रॅकेट चालवत असल्याचा पोलिसांना संशय आहे.

नाशिक : Nashik Drug Case : त्र्यंबकेश्वरजवळ मोठ्या प्रमाणात परदेशी विद्यार्थी वास्तव्यास आहेत. या विद्यार्थ्यांकडून स्थानिक नागरिकांना त्रास होत असल्याच्या तक्रारी पोलिसांना प्राप्त झाल्या होत्या. तसंच या विद्यार्थ्यांकडं ड्रग्ज असावं अशी शंका असल्यानं पोलिसांनी या भागात सर्च ऑपरेशन राबवलं. पोलिसांनी परदेशी विद्यार्थ्यांच्या घरांची तपासणी करून, त्यांची अंगझडती घेतली. यावेळी त्यांच्याकडं पोलिसांना कुठल्याही आक्षेपार्ह वस्तू मिळाल्या नाहीत.

कॉफी शॉप सील : मुंबई पोलिसांनी ड्रग्ज माफिया ललित पाटीलचा नाशिकमधील एमडी ड्रग्जचा कारखाना उध्वस्त केल्यानंतर नाशिक पोलीस एक्शन मोडवर आहेत. नाशिक पोलिसांनी ड्रग्जविरोधात धडक मोहीम राबवली असून, एमडी ड्रग्ज विक्री करणाऱ्या 12 जणांना अटक केली आहे. तसंच शहरातील 9 कॉफी शॉपमध्ये युवक-युवती ड्रग्जचं सेवन करत असल्याच्या कारणानं कॉफी शॉपला सील करण्यात आलं आहे.

त्र्यंबकेश्वर महिरावणी भागात अनेक परदेशी विद्यार्थी वास्तव्यास आहेत. यात बहुतांशी आफ्रिकन विद्यार्थी आहेत. स्थानिक नागरिकांना त्यांच्याकडून त्रास होत होता. आम्ही या भागातील 35 परदेशी विद्यार्थ्यांची अचानकपणे घरझडती घेतली. मात्र, त्यात कुठलेही आक्षेपार्य वस्तू आढळून आल्या नाहीत. तसेच आम्ही हॉटेल आणि लॉजिंगची तपासणीसुद्धा केली आहे. अवैध व्यवसायाबाबत नागरिकांना काही माहिती असल्यास त्यांनी 6262256363 या नाशिक ग्रामीण पोलीस हेल्पलाइन नंबरवर ती माहिती द्यावी, माहिती देणाऱयाचे नाव देखील विचारले जाणार नाही - बिपीन शेवाळे, पोलीस अधिकारी, त्र्यंबकेश्वर पोलीस ठाणे

परदेशी विद्यार्थ्यांच्या घराची झडती : पोलिसांनी त्र्यंबकेश्वर रोडवरील लॉजिंगची तपासणी केली. अशात त्र्यंबकेश्वर भागामध्ये अनेक महाविद्यालय असून, या ठिकाणी परदेशी विद्यार्थी शिक्षण घेत आहेत. यात सर्वाधिक नायजेरियन विद्यार्थ्यांचा समावेश आहे. गेल्या अनेक दिवसांपासून ते राहत असलेल्या ठिकाणी स्थानिक नागरिकांना त्यांच्याकडून त्रास होत असल्याच्या तक्रारी पोलिसांना प्राप्त झाल्या होत्या. तसंच ते ड्रग्जचं सेवन करत असल्याची माहिती पोलिसांना मिळाली होती. पोलिसांनी त्र्यंबकेश्वर महिरावणी भागामध्ये परदेशी विद्यार्थ्यांच्या घरामध्ये जाऊन धडक तपासणी मोहीम राबवली. यावेळी 32 घरांची तपासणी करण्यात आली, यावेळी विद्यार्थ्यांची अंगझडती घेतली. मात्र, यात कुठलेही आक्षेपार्ह वस्तू आढळून आल्या नसल्याचं पोलिसांनी सांगितलं.

35 अनधिकृत पान टपऱ्या हटवल्या : शाळांपासून 100 मीटर परिसरात कुठलेही ड्र्गज विक्री करण्यास बंदी असल्याचा नियम दाखवत, विद्यार्थी अमली पदार्थाच्या आहरी जात असल्याच्या तक्रारी संस्थाचालक, शिक्षक, पालकांनी पोलिसांकडं केल्या होत्या. याची दखल घेत पालिका, पोलिसांनी धडक कारवाई करत शाळांच्या परिसरातील अनधिकृत 35 पानटपऱ्यांवर मनपाच्या अतिक्रमण विभागानं हटवल्यात.

5 किलोमीटर अंतरावर 60 लॉज : नाशिक- त्र्यंबकेश्वर रस्त्यावर 5 किलोमीटर अंतरावर 60 हून अधिक विना परवाना लॉज, हॉटेल्स आहेत. या भागात खासगी विद्यापीठ, महाविद्यालयांसह शाळा असल्यानं हजारो विद्यार्थ्यांचा वावर या ठिकाणी असतो. या रस्त्यावरच महत्त्वाची धार्मिक स्थळं असूनसुद्धा या रस्त्यावरील लॉजमध्ये गैरकृत्ये सुरू असल्याचं चित्र आहे. त्याबाबत भाविकांनी संताप व्यक्त केला आहे.

पोलिसांचे आर्थिक हितसंबंध : लॉजमध्ये सकाळी सातपासून मध्यरात्रीपर्यंत तरुण-तरुणींचा वावर दिसतो. एक तासासाठी 500 रुपये प्रमाणे येथील रुम भाड्यानं दिल्या जातात. काही लॉजमध्ये अवैधरित्या मद्यविक्री होत असल्याचीही माहिती आहे. तसेच काही लॉजमध्ये देहविक्री व्यवसायही सुरू असल्याचा दावा स्थानिक रहिवाशांनी केला आहे. या लॉज चालकांशी पोलिसांचे आर्थिक हितसंबंध असल्यानं कारवाई होत नसल्याचा आरोप देखील नागरिक करत आहेत.

हेही वाचा -