नाशिक - कोरोना विषाणूनं संपूर्ण जग वेठीस धरल आहे. मात्र या आजारावर अद्याप उपचार मिळाला नसल्याने सामाजिक अंतर राखणे हाच एक पर्याय सर्वांसमोर आहे. मात्र याच सामजिक नंतराने एका पाच दिवसाच्या बाळाला आपल्या आईपासून दूर केलं आहे. नाशिकच्या जिल्हा शासकीय रुग्णालयात कोरोनाबाधित पाच दिवसांच्या बाळावर उपचार सुरू आहेत. मात्र आपलं बाळ आपल्यापासून दूर असल्याने आईच्या मनाची घाळमेल सुरू आहे. आईचं मुलाबद्दल असलेली ओढ बघता डॉक्टर आणि परिचारिका दिवसातून दोनदा व्हिडिओ कॉल करून आईचा आणि बाळाचा संपर्क घडवून आणत आहेत.
कोरोनामुळे आई अन् नवजात बाळाची ताटातूट नाशिक जिल्हा रुग्णालयात विंचूर येथील एक महिला प्रसूतीसाठी दाखल झाली होती. त्यावेळी कोरोना चाचणीसाठी तिचे नमुने प्रयोगशाळेत तपासणीसाठी पाठवण्यात आले होते. मात्र या महिलेचा रिपोर्ट येण्या आगोदरच तिने एका गोंडस बाळाला जन्म दिला. दुसऱ्या दिवशी आईचा रिपोर्ट निगेटिव्ह आल्याने जिल्हा प्रशासनाने सुटकेचा निःश्वास सोडला. खबरदारी म्हणून या बाळाचे नमुने देखील कोरोना चाचणीसाठी पाठवण्यात आले. मात्र दुर्दैवाने 11 मे रोजी या बाळाचा रिपोर्ट कोरोना पॉझिटिव्ह आल्यानं त्याला विशेष कक्षात ठेऊन त्यावर उपाचार करण्यात येत आहेत. चिमुकल्या बाळाची आईपासून ताटातूट ही बाब सर्वांसाठी चिंतेचा विषय ठरली होती. मात्र जिल्हा रुग्णालयातील डॉक्टर आणि परिचारिका या बाळाची देखभाल करत एका आईची भूमिका पार पाडत आहेत. बाळाला भेटता येत नाही, त्याला कुशीत घेता येत नाही म्हणून एका आईची तळमळ बघता डॉक्टर आणि परीचारिका दिवसांतून दोनदा बाळाजवळ जाऊन व्हिडिओ कॉल करुन बाळाची सुखरूपता आईपर्यंत पोहोचवत आहेत. सध्या हे गोंडस बाळ सुखरूप असून सहा दिवसांपासून त्यांची कोरोनाशी झुंज सुरू असून नव्या नियमानुसार दोन-तीन दिवसात त्याला डिस्चार्ज दिला जाईल, असं डॉक्टरांनी सांगितलं.रुग्णालयातील परिचारिका कुमोदिनी आहिरे यांनी सांगितले, की आमच्याकडे एक महिला प्रसूतीसाठी दाखल झाली होती. तिने बाळाला जन्म दिल्यानंतर आम्ही दोघांचे नमुने कोरोना चाचणीसाठी पाठवले होते. यात बाळाचा रिपोर्ट पॉझिटिव्ह आला आहे. आम्ही एक आई म्हणून बाळाची आवश्यक ती सर्व काळजी घेत आहे. बाळाच्या आईची मुलापासून झालेली ताटातूट बघता आणि व्हिडिओ कॉलद्वारे त्यांचा संवाद करून देतो. एक आई म्हणून आम्हला जितके करता येते, ते आम्ही करत आहोत.
