नाशिक - 'पुणे-नाशिक रेल्वे मार्गात ज्या शेतकऱ्यांच्या जमिनी गेल्या आहेत. त्या शेतकऱ्यांना जमिनीच्या बदल्यात 5 पट मोबदला मिळवून देण्यात येईल. कुठल्याही शेतकऱ्यांवर अन्याय होऊ देणार नाही. शासन या शेतकऱ्यांना योग्य ते सहकार्य करेल', असे आश्वासन नाशिक जिल्ह्याचे पालकमंत्री छगन भुजबळ यांनी नाशिक-पुणे रेल्वे मार्गात जमिनी गेलेल्या शेतकऱ्यांच्या शिष्ठमंडळाला दिले. तालुक्यातील नाणेगाव व परिसरातील शेतकऱ्यांच्या शिष्ठमंडळाने आज (14 जून) छगन भुजबळ यांची नाशिक येथील कार्यालयात भेट घेऊन आपल्या मागणीचे निवेदन दिले.
'जमिनीचा योग्य मोबदला मिळावा'
'नाणेगाव येथे पुणे-नाशिक रेल्वे मार्गाचे भूसंपादन व अधिग्रहीत शेतजमिनीचे मोजणीचे काम सुरु आहे. हे भूसंपादन गावातील २१.५ हेक्टर बारमाही बागायती क्षेत्राचे होणार आहे. या क्षेत्रात द्राक्षे, कांदा, ऊस, फळझाडे व इतर बागायती नगदी पिके घेतली जातात. या प्रकल्पामुळे शेतकऱ्यांचे मोठ्या प्रमाणात आर्थिक व भौगोलिक नुकसान होणार आहे. शेतकऱ्यांच्या जमिनी बारमाही बागायती आहेत. तसेच उदरनिर्वाहाचे साधन शेतीच आहे. त्यामुळे जमिनीचा योग्य मोबदला मिळावा', अशी मागणी भुजबळांना दिलेल्या निवेदनात केली आहे.
'प्रकल्पग्रस्ताचा दाखला व नोकरी मिळावी'
तसेच, 'रेल्वेलाईनमुळे शेतकऱ्यांच्या क्षेत्राची 2 ते 3 तुकड्यात विभागणी होणार आहे. त्यामुळे संपूर्ण क्षेत्राची संमतीनुसार खरेदी करण्यात यावी. द्राक्षबागा निर्यातक्षम दर्जाच्या असल्याने त्या निर्यातदार शेतकऱ्यांचे मोठ्या प्रमाणात आर्थिक नुकसान होणार आहे. त्यामुळे द्राक्षबाग शेती क्षेत्राची विभागणी झाल्यास उर्वरीत संपूर्ण द्राक्षबागेचा व इतर साधन सामुग्रीचा व बांधावरील फळझाडांचा योग्य मोबदला मिळावा. बाधित होणाऱ्या पाईपलाईन पंचवीस मीटरवर क्रासिंग होण्याकरीता व्यवस्था असावी. पाईपलाईन विहिर, बोअरवेल यांचा योग्य मोबदला मिळावा. बाधित होणाऱ्या शेतकऱ्यांना प्रकल्पग्रस्त दाखला मिळावा. त्या शेतकऱ्यांच्या कुटुंबातील एकास सरकारी नोकरी मिळावी. या प्रकल्पामुळे बाधित होणाऱ्या क्षेत्राच्या व्यतिरीक्त रेड झोन नसावा', अशा विविध मागण्या निवेदनाद्वारे केलेल्या आहे.
हेही वाचा - कॉंग्रेस हायकमांडने जबाबदारी दिली, तर मुख्यमंत्रीही होईन - नाना पटोले
