नाशिक - कडकनाथ कुक्कुटपालन व्यवसायात होत असलेल्या फसवणुकीचे लोन आता नाशिकमध्ये देखील पसरल्याचे दिसत आहे. सांगली, सातारा, कोल्हापूर आणि पुण्यानंतर नाशिकमध्ये महारयत अॅग्रो इंडिया या कंपनीच्या ४ संचालकांवर गुन्हा दाखल करण्यात आला आहे. तर, फसवणूक झालेल्या शेतकऱ्यांनी सरकारने हस्तक्षेप करून न्याय मिळून द्यावा अन्यथा आत्महत्या केल्याशिवाय पर्याय नाही अशा उद्विग्न प्रतिक्रिया दिल्या आहे. या प्रकरणी आत्तापर्यंत ८ हजाराहून अधिक लोकांची फसवणूक झाली. तर, राज्यात जवळपास ५०० कोटींचा गैरव्यवहार झाल्याची माहिती आहे.
गेल्या काही दिवसांपासून कडकनाथ कुक्कुटपालन हा व्यवसाय फसवणुकीच्या गर्तेत अडकल्याने चर्चेचा विषय ठरत आहे. सातारा, सांगली, कोल्हापूर आणि पुण्यात यापूर्वीच सांगली जिल्ह्यातील महारयत अॅग्रो इंडिया प्रा. लिमिटेड इस्लामपूर या कंपनीच्या संचालकांवर गुन्हे दाखल आहेत. तर, नाशिकमध्ये देखील अशाच प्रकारे अनेक शेतकऱ्यांची फसवणूक झाल्याने नाशिकच्या सरकारवाडा पोलिसांत तक्रारी येऊ लागल्या आहेत.
हेही वाचा - कडकनाथ कोंबडी घोटाळा प्रकरणी फसवेबाज कंपनीच्या 'त्या' संस्थापकाला अटक
सदर माहितीप्रमाणे या कंपनीने नाशिकच्या कॅनडा कॉर्नर याठिकाणी कार्यालय सुरू केले होते. प्रदर्शन भरवून अनेकांना माहितीही दिली जात होती. यात नाशिकच्या सय्यद पिंपरी या गावातील शिवदास साळुंके (६३) यांनी हा व्यवसाय सुरू केला होता. यामध्ये २ ते ३ दिवसांच्या कोंबडीच्या पिल्ल्यांचा ३ महिने सांभाळ करून दिल्यावर दुप्पट ते तिप्पट रक्कम मिळणार होती. मात्र ती सांभाळ प्रक्रिया पूर्ण झाल्यावर कंपनीचे लोक १५ दिवसांनंतर पैसे देतो अस सांगून कोंबड्या घेऊन गेले. त्यानंतर पैसे मिळत नसल्यामुळे आपली फसवणूक झाल्याचे साळुंकेच्या लक्षात आल्याने त्यांनी याबाबत पोलीस ठाण्यात तक्रार दाखल केली.
या प्रकरणी पोलिसांनी गुन्हा दाखल केला असून तपासासाठी एक पथक ही रवाना करण्यात आले आहे. या प्रकरणी आत्तापर्यंत ८ हजाराहून अधिक लोकांची फसवणूक झाली असल्याचा अंदाज पोलिसांकडून लावला जात आहे. तर, ५०० कोटीहुन जास्तचा गैरव्यवहार झाल्याचे सांगितले जात आहे. कडकनाथ कुक्कुटपालन व्यवसायाच्या बहाण्याने महारयत ऍग्रो इंडिया कंपनीने अनेकांना गंडा घातला असून हळूहळू यातील रकमेचा आणि तक्रारदारांचा आकडा वाढणार असल्याचा अंदाज वर्तविण्यात येत आहे.
हेही वाचा - ''कडकनाथ' प्रकरणी सदाभाऊ खोतांचा राजीनामा घ्यावा'
