येवला (नाशिक) - जिल्ह्यात दिवसेंदिवस कोरोना रुग्णांमध्ये मोठ्या प्रमाणात वाढ होत आहे. या संख्येवर आळा घालण्यासाठी प्रशासनाकडून कडक पावले उचलण्यात येत आहे. बाहेरील गावांमधून नाशिकमध्ये येणाऱ्या प्रवाशांची कोरोना चाचणी करण्यात येत आहे. या पार्श्वभूमीवर येवला तालुक्यातील खामगाव पाटी येथे पोलिसांकडून नाकेबंदी करण्यात आली आहे. दरम्यान औरंगाबाद जिल्ह्यातून नाशिक जिल्ह्यात येणाऱ्या प्रवाशांची आरोग्य विभागाकडून रॅपीड अँटीजन टेस्ट करण्यात येत आहे.
खामगाव पाटी येथे नाकेबंदी करत प्रवाश्यांची कोरोना चाचणी नाशिक व औरंगाबाद जिल्ह्याच्या मध्यावर असलेल्या येवला तालुक्यातील खामगाव पाटी येथे येवला आरोग्य विभाग व पोलीस यांच्या संयुक्त विद्यमाने इतर जिल्ह्यातून नाशिक जिल्ह्यात प्रवेश करणाऱ्या प्रवाशांची रॅपीड अँटीजन टेस्ट करण्यात येत आहे. त्यात चारचाकी तसेच दुचाकीवरील नागरिकांचीदेखील रॅपीड अँटीजन टेस्ट करण्यात येत आहे. यावेळी इतर जिल्ह्यातून येणाऱ्या वाहनांची ई पास तपासणी करण्यात येत असून यावेळी ज्यांच्याकडे ई पास नाही. अशा गाड्यांना माघारी पाठवण्यात येत आहे.
2 जणांचा अहवाल पॉझिटिव्हनाशिक जिल्ह्यात प्रवेश करणाऱ्या वाहनांमधील नागरिकांची रॅपीड अँटीजन टेस्ट करण्यात येत असताना त्यात दोन जण हे पॉझिटिव्ह आढळून आले आहेत. या रुग्णांना येवल्यातील बाभूळगाव येथे विलगीकरण करण्यात आले आहे. ही मोहीम लॉकडाऊन असेपर्यंत रोज सुरू राहणार असल्याची माहिती तालुका आरोग्य अधिकारी डॉ. शरद कातकाडे यांनी दिली.
