नाशिक- ओझर येथून काम आटपून मुंबई-आग्रा महामार्गवरून नाशिकच्या दिशेने येणाऱ्या दुचाकीला आडगावजवळ अज्ञात वाहनाने जोरदार धडक दिली. यात दुचाकीवरील दोघांचा जागीच मृत्यू झाला. विशेष म्हणजे यातील दुचाकीचालक मलंग बागवान यांनी हेल्मेट परिधान केले होते. याबाबत आडगाव पोलीस ठाण्यात अज्ञात वाहनाविरुद्ध अपघाताचा गुन्हा दाखल करण्यात आला.
हेही वाचा- डाटा लीक झाल्याचा गुगलपाठोपाठ ट्विटरचा भारतीयांना इशारा
ओझरवरून काम आटपून मुंबई-आग्रा महामार्गवरून नाशिककडे येत असतांना आडगाव जवळ अज्ञात वाहनाने दुचाकीला पाठीमागून जोरदार धडक दिली. या घटनेत दुचाकीवरील जुने नाशिक भागातील दोघेजण जागीच मृत झाले. या अपघातात नाईकवाडी पुरा भागातील सय्यद कुटुंबातील एकुलता-एक मुलगा अझहर (वय 27) तर काजीगाडी भागातील मलंग बागवान (वय40) यांचा मृत्यू झाला आहे. या घटनेमुळे जुने नाशिक भागत शोककळा पसरली आहे.
अझहर याने काही दिवसांपूर्वीच नवीन दुचाकी खरेदी केली होती. ह्या गाडीला अजून आरटीओकडून नंबरही मिळाला नव्हता. त्यातच हा अपघात झाला. मलंग हे डोक्यावर हेल्मेट परिधान करून दुचाकी चालवत होते. तर अझहर हे त्यांच्या सोबत पाठीमागे बसले होते, असे पोलिसांकडून सांगण्यात आले आहे. या प्रकरणी अझहर यांच्या भावाने दिलेल्या तक्रारीवरून आडगाव पोलीस ठाण्यात अज्ञात वाहनाविरुद्ध अपघाताचा गुन्हा दाखल करण्यात आला आहे.
