नंदुरबार - जिल्हा रुग्णालयातील एकलव्य कोविड कक्षात उपचार घेत असलेल्या 48 कोरोना रुग्णांनी कोरोनावर मात केली असून त्यांना घरी सोडण्यात आले. इतक्या मोठ्या प्रमाणात कोरोनावर मात करणाऱ्या रुग्णांना डिस्चार्ज देण्याची पहिली वेळ असल्याने आरोग्य यंत्रणेचे पालकमंत्री के. सी. पाडवी यांनी अभिनंदन केले. तर दुसरीकडे संध्याकाळी प्राप्त झालेल्या अहवालात 10 जण पॉझिटिव्ह आल्याने चिंता पुन्हा वाढली.
जिल्हाधिकारी डॉ. राजेंद्र भारुड आणि पोलीस अधिक्षक महेंद्र पंडित यांच्या उपस्थितीत 48 रुग्णांना घरी सोडण्यात आले. याप्रसंगी आरोग्य कर्मचाऱ्यांसह पथके उपस्थित होते. जिल्ह्यातून पहिल्यांदा एवढ्या मोठ्या प्रमाणावर रुग्णांनी कोरोनावर मात केल्याने आनंद व्यक्त केला जात होता. तर दुसरीकडे दिवसभरात नंदुरबार जिल्ह्यात 10 कोरोनाबाधित आढळून आले आहेत.
34 वर्षीय पुरुष, तळोदा येथील दामोदर नगरमधील 50 वर्षीय पुरुष , शहादा तालुक्यातील तोरखेडा येथील 22 वर्षीय पुरुष, 57 वर्षीय पुरुष, 37 वर्षीय महिला, 78 वर्षीय पुरुष, 35 वर्षीय महिला, 46 वर्षीय पुरुष , 42 वर्षीय महिला, 49 वर्षीय पुरुष असे 10 जण बाधित आढळून आले आहेत. बाधीत राहत असलेले परिसर प्रतिबंधित क्षेत्र म्हणून घोषित करण्यात आला आहे.
नव्याने 10 रुग्ण आढळल्याने एकूण कोरोना रुग्णांची संख्या 190 वर गेली आहे. त्यापैकी 4 रुग्णांवर जिल्ह्याबाहेर उपचार सुरु आहेत. जिल्ह्यात एकूण 94 रुग्णांवर उपचार सुरु होते. त्यापैकी 48 रुग्णांनी कोरोनावर मात केल्याने, आता फक्त 46 रुग्णांवर उपचार सुरू आहेत. तर 8 जणांचा मृत्यू झाला आहे.
