नंदुरबार - पेणनंतर राज्यातील सर्वात मोठे गणेशमूर्ती बनविणारे कारखाने नंदुरबार शहरात आहेत. मात्र, यावर्षी कोरोनाचा सर्वाधिक फटका गणेशमूर्ती बनविणाऱ्या कारखान्यांना बसला आहे. अजूनही गुजरात आणि मध्यप्रदेशातून मंडळाच्या मूर्तीसाठी मागणी न झाल्याने मूर्तिकार चिंतीत झाले आहेत. त्यामुळे कोरोनाची परिस्थिती कायम राहिल्यास घरपोच गणेशमूर्ती पोहोचविण्याचे नियोजन करण्यात येत आहे.
नंदुरबार जिल्ह्यात गणेशोत्सव मोठ्या प्रमाणावर साजरा केला जात असतो. त्यामुळे शहरात मोठ्या प्रमाणावर मूर्तिकारांचे कारखाने आहेत. शहरात गणेशमूर्ती बनविणारे जवळपास २०० पेक्षा अधिक लहान मोठे कारखाने आहेत. त्यातून ५ हजारपेक्षा अधिक लोकांना बाराही महिने रोजगार मिळत असतो. मात्र, यावर्षी गणेशोत्सवावर कोरोनाचे संकट असल्याने कारखान्यातील लगबग मंदावली आहे. गेल्या वर्षाच्या तुलनेत यंदा केवळ २५ टक्के मूर्ती तयार करण्यात आल्या आहेत. त्याचसोबत ५ फुटांपेक्षा मोठ्या गणेशमूर्तींची अजून नोंदणी सुरू झाली नाही. त्यामुळे यंदा मोठ्या मूर्ती न बनविल्याने आर्थिक नुकसान सोसावे लागेल. त्याचबरोबर यावर्षी उलाढाल कमी होईल, असा अंदाज मूर्तिकार सुनील चौधरी यांनी व्यक्त केला आहे.
गणेश उत्सवापर्यंत हे कोरोना संकट कायम राहिल्यास नंदुरबार येथील कारखानदार नारायण वाघ यांनी गणेश भक्तांना घरपोच मूर्ती पोहोचवण्याचे नियोजन केले आहे. मात्र, सार्वजनिक गणेश मंडळांसाठी मोठ्या मूर्ती घरपोच देण्यासंदर्भात आणखी कोणताही निर्णय झाला नसल्याचे मूर्तिकारांनी सांगितले. त्याचबरोबर परराज्यातून येणारे गणेश भक्त यंदा मूर्ती घेण्यासाठी येतील की नाही, असा प्रश्नही मूर्तिकार नारायण वाघ यांना पडला आहे.
विघ्नहर्ता गणेशाच्या उत्सवावर कोरोनाचे विघ्न आले आहे. गणेशोत्सवापर्यंत कोरोनाची स्थिती काय राहिल यावरून राज्य शासन गणेशोत्सवासंदर्भात निर्णय घेईल. मात्र, तयार झलेल्या मुर्तींची विक्री झाली नाही, तर त्यांना सांभाळून ठेवण्याची तारेवरची कसरत करावी लागणार असल्याने कारखानदार चिंतेत आहेत. आता विघ्नहर्ता गणेशाने हे विघ्न दूर करावे हीच अपेक्षा मूर्तिकारांसह गणेश भक्त व्यक्त करत आहे.
