नंदुरबार - जिल्ह्यात कोरोनाचा कहर वाढला असून शुक्रवारी एकाच दिवशी 17 नवे कोरोना पॉझिटिव्ह रुग्ण आढळले आहेत. यात नंदुरबारातील सहा, शहाद्यातील आठ जणांना तर नंदुरबार तालुक्यातील खोंडामळी, नवापूर शहर व अक्कलकुवा तालुक्यातील मोलगी येथे कोरोनाचे प्रत्येकी एक रुग्ण आढळले आहेत. नंदुरबार येथील एका 14 वर्षीय मुलीला कोरोनाची लागण झाली आहे. नवापूर शहर व खोंडामळी गावात कोरोनाने शिरकाव केल्यामुळे नागरिकांमध्ये खळबळ उडाली आहे. जिल्ह्यात कोरोनाबाधितांचा आकडा 180 वर पोहोचला आहे. तर नंदुरबार येथील सिंधी कॉलनीतील दोन बाधितांनी कोरोनावर मात केल्याने संसर्गमुक्त झाले आहेत. दरम्यान नवापूर शहर दोन दिवस लॉकडाऊन करण्यात आले आहे. या दरम्यान केवळ अत्यावश्यक सेवा सुरू राहणार आहे.
खान्देशात जळगाव व धुळे या दोन्ही जिल्ह्यांच्या तुलनेत कोरोनाच्या आकडेवारीत नंदुरबार जिल्हा मागे असला तरी गेल्या महिन्याभरापासून नंदुरबार जिल्ह्यात दिवसेंदिवस कोरोनाचे रुग्ण आढळून येत आहेत. जळगाव व धुळे जिल्हा कोरोनाचे हॉटस्पॉट बनले असून या दोन्ही जिल्ह्यांनी रुग्णांच्या आकडेवारीत हजारांचा आकडा पार केला आहे. असे असताना नंदुरबार जिल्ह्यात कोरोना रुग्णांची संख्या कमी असली तरी महिन्याभरापासून दिवसेंदिवस आढळून येणार्‍या कोरोना रुग्णांमुळे आकडेवारी 200 च्या उंबरठ्यावर येऊन पोहोचली आहे. जिल्ह्यात आठ जणांचा कोरोनाने मृत्यू झाला आहे. गेल्या तीन दिवसात दोन बाधितांचा कोरोनाने मृत्यू झाल्याने जिल्हावासिय चिंतेत आहेत. एकीकडे चिंता असली तरी बाधित रुग्ण कोरोनावर मात करित असल्याने ते संसर्गमुक्त होत असल्याने ही दिलासादायक बाब आहे.
शुक्रवारी दुपारी आलेल्या अहवालात पाच नवे कोरोना पॉझिटिव्ह रुग्ण आढळले. यात नंदुरबार शहरातील रेल्वे कॉलनीतील 36 वर्षीय पुरुष, देसाईपुरा भागातील 50 वर्षीय महिला व नंदुरबार पंचायत समितीतील 32 वर्षीय पुरुष तर नंदुरबार तालुक्यातील खोंडामळी येथे 50 वर्षीय पुरुष व नवापूर येथील मंगलदास पार्कमधील 65 वर्षीय महिलेला कोरोनाची लागण झाली आहे. नंदुरबार तालुक्यातील खोंडामळी या गावात कोरोनाचा एकही रुग्ण नसतांना काल आलेल्या अहवालात गावातील एक जण पॉझिटिव्ह आढळल्याने कोरोनाने खोंडामळीमध्ये शिरकाव केला आहे. यामुळे ग्रामस्थांमध्ये खळबळ उडाली आहे.
महाराष्ट्र व गुजरात या दोन राज्यांच्या सीमेसह महामार्गालगत असलेल्या नवापूर शहरात कोरोनाचा एकही रुग्ण नसल्याने शहर कोरोनामुक्त होते. तर नवापूर तालुक्यात एक रुग्ण आढळल्याची नोंद होती. परंतु शुक्रवारी आलेल्या अहवालात नवापूर येथील मंगलदास पार्कमधील महिला कोरोना पॉझिटिव्ह आल्याने शहरात कोरोनाचा पहिला रुग्ण आढळला आहे. यामुळे नागरिकांमध्ये खळबळ उडाली आहे. तसेच रात्री प्राप्त झालेल्या अहवालात 12 जण कोरोना पॉझिटीव्ह आढळून आले आहेत. यामध्ये नंदुरबारातील तीन, शहादा शहर व तालुक्यातील आठ व अक्कलकुवा तालुक्यातील मोलगी येथील एका व्यक्तीचा समावेश आहे. यात नंदुरबार शहरातील सरस्वती नगरात 21 वर्षीय युवक, 44 वर्षीय महिला व 14 वर्षीय मुलगी अशा तिघांना कोरोनाची लागण झाली आहे.
शहादा येथील साईबाबा नगरातील 37 वर्षीय पुरुष, वृंदावन नगरातील 62 वर्षीय पुरुष, कल्पना नगरातील 34 वर्षीय पुरुष, सदाशिव नगरातील 20 वर्षीय युवती, शहादा तालुक्यातील कुकडेल येथील गांधी नगरात 35 वर्षीय पुरूष व कुकडेल भागात 24 वर्षीय युवक व 50 वर्षीय महिला असे 8 रुग्ण कोरोना पॉझिटिव्ह आढळले आहेत. तसेच अक्कलकुवा तालुक्यातील मोलगी येथे 23 वर्षीय युवतीला कोरोनाची लागण झाली आहे. अहवाल कोरोना पॉझिटिव्ह येताच प्रशासनासह आरोग्य विभागाने बाधितांच्या वास्तव्याचा परिसर सील केला आहे. तर नगरपालिका व ग्रामपंचायतीने सदर भागात निर्जंतुकीकरण फवारणी केली आहे. आरोग्य विभागाकडुन बाधितांच्या संपर्कातील लोकांची माहिती घेवुन सर्वेक्षण मोहीम राबविण्यात येत आहे.
कोरोना पॉझिटिव्ह आढळलेल्या बाधितांच्या संपर्कातील व्यक्तींचा शोध घेऊन त्यांना आरोग्य विभागाने क्वॉरंटाईन केले आहे. नंदुरबार जिल्ह्यात शुक्रवारी 17 जणांचा कोरोना अहवाल पॉझिटिव्ह आलेला असताना जिल्हावासियांची चिंता वाढली. तसेच नंदुरबार येथील सिंधी कॉलनीतील दोन जण संसर्गमुक्त झाल्याने दिलासा मिळाला. या दोघांना शुक्र्वारी जिल्हा रुग्णालयातून घरी पाठविण्यात आले. जिल्ह्यात बाधितांचा आकडा 180 झाला असून त्यापैकी 83 जणांनी कोरोनावर मात केली आहे. तर 8 जणांचा मृत्यू झाला असून 76 कोरोनाबाधित जिल्हा रुग्णालयात उपचार घेत आहेत. शनिवारी 80 नमुने तपासणीसाठी घेण्यात आले असून 168 जणांचे अहवाल प्रलंबित आहेत.
