नांदेड - शहरातील एका प्रकरणात पोलिसांनी आरोपीला अटक करावी यासाठी एका तरुणीने पोलीस ठाण्यातच आत्महत्येचा प्रयत्न केला. शिवाजीनगर पोलीस ठाण्यात ही घटना घडली.
शिवाजीनगरमध्ये राहणाऱ्या एका 22 वर्षीय तरुणीने काही दिवसांपूर्वी शिवाजीनगर पोलीस ठाण्यात काही जणांविरुध्द तक्रार दिली होती. या प्रकरणातील आरोपींना अजून अटक झालेली नाही. त्यामुळे या तरुणीने रविवारी रात्री ८ वाजण्याच्या सुमारास पोलीस ठाणे गाठले. तिने पोलीस निरीक्षक ए. एन. नरुटे यांच्या कक्षात जाऊन आरोपींना अद्याप अटक का केली नाही? याचा जाब विचारला. तेव्हा नरुटे व सहकारी तिची समजूत काढत असतानाच तिने विषारी औषध पिऊन आत्महत्या करण्याचा प्रयत्न केला.
हेही वाचा - माहूरच्या रेणुकादेवी घाटात ऑटो पलटी; २ महिला भाविकांचा मृत्यू, ५ गंभीर जखमी
या घटनेनंतर पोलिसांची एकच धावपळ उडाली. तिला उपचारार्थ विष्णूपुरीच्या शासकीय रुग्णालयात दाखल करण्यात आले असून तिची प्रकृती धोक्याबाहेर आहे, अशी माहिती सहाय्यक पोलीस निरीक्षक रवी वाहुळे यांनी दिली. याप्रकरणी जमादार संतोष सूर्यवंशी यांनी दिलेल्या तक्रीवरून शिवाजीनगर पोलीस ठाण्यात तरुणीविरुध्द कलम 309 प्रमाणे गुन्हा दाखल करण्यात आला आहे. याप्रकरणी सहाय्यक पोलीस निरीक्षक रवी वाहुळे अधिक तपास करत आहेत.
